တအာင်းအမျိုးသားလွတ်မြောက်ရေးတပ်မတော် TNLA နဲ့ မဟာမိတ် KIA တို့အကြား မြေပြင်ပဋိပက္ခများ မကြီးထွားလာစေရန် ထိန်းထိန်းသိမ်းသိမ်း ဆောင်ရွက်သွားရမယ်လို့ TNLA စစ်ဦးစီးချုပ်က တိုက်တွန်းထားတယ်လို့ သိရပါတယ်။
ယမန်နေ့ ဖေဖော်ဝါရီလ ၂၈ ရက်နေ့က မန်တုံမြို့နယ် လူထုတွေ့ဆုံပွဲမှာ PSLF/TNLA ၏ စစ်ဦးစီးချုပ် ဗိုလ်ချုပ် တားဟိူဝ်ပ္လါင် က အထက်ပါအတိုင်း ပြောကြားတာဖြစ်ပါတယ်။
ဒါ့အပြင် မိမိတို့ မဟာမိတ်နှစ်ဖွဲ့အကြား အပြန်အလှန်အသိအမှတ်ပြုရန်နဲ့ မဟာမိတ်တည်တံ့ခိုင်မြဲစေရန် နှစ်ဖက်တပ်က ပူးပေါင်းဆောင်ရွက်သွားရမည့်အချိန်ဖြစ်ပြီး မဟာမိတ် ကတိကဝတ်ကို ရှေးရှု၍ မဟာမိတ်ကြား မလိုလားအပ်သော ပြဿနာများ မဖြစ်ပွားလာစေရန် မဟာမိတ်နှစ်ဖက်လုံးမှ သတိထားဆောင်ရွက်ရမည်ဖြစ်ကြောင်းနှင့် ဆက်ဆံရေးတင်းမာမှုများအား ညှိနှိုင်းဖြေရှင်းရမည်ဖြစ်ကြောင်း ပြောကြားခဲ့တယ်လို့ TNLA ရဲ့ ထုတ်ပြန်ချက်မှာ ဖော်ပြထားပါတယ်။
ဖေဖော်ဝါရီလ ၂၇ ရက် နေ့လည်ပိုင်းက မန်တုံမြို့နယ်၊ မန်မောက်ရွာရှိ KIA တပ်စခန်းကို TNLA တပ်ဖွဲက သွားရောက်စီးနင်းပြီး နှစ်ဖက်တပ်ဖွဲ့ ထိုးကြိတ်မှုဖြစ်ပွားခဲ့တယ်လို့ ဒေသတွင်းသတင်းရင်းမြစ်ထံမှ သိရပါတယ်။
သျှမ်းပြည်နယ်မြောက်ပိုင်းမှာ TNLA နဲ့ KIA တို့အကြား နယ်မြေအငြင်းပွားမှုများ မကြာခဏဖြစ်ပေါ်နေတာပဲဖြစ်ပါတယ်။
