သျှမ်းပြည်နယ်မြောက်ပိုင်း သီပေါမြို့နယ် နမ့်လန်မြို့အတွင်းရှိ လူနေအိမ်များအား SSPP အဖွဲ့မှ ယခုတစ်ပတ်အတွင်း ညပိုင်း(၈)နာရီမှ နံနက်(၄)နာရီအချိန်အထိ အိမ်တံခါးများလိုက်ခေါက်ပြီး သျှမ်းလူငယ်များအား တပ်သားသစ်အတွက် လိုက်လံဖမ်းဆီးနေသည်ဟု ဆိုသည်။
“တစ်ညကို တစ်ရပ်ကွက်နှုန်း အိမ်တံခါးတွေလိုက်ခေါက်ပြီး လူငယ်တွေကို လိုက်ဖမ်းနေတာ တစ်ပတ်လောက်ရှိပြီ။ သတင်းကြိုရတဲ့ လူငယ်တွေတော့ ထွက်ပြေးကုန်ကြပြီ။ တစ်ညကို (၃)ယောက်ကနေ (၆) ယောက်အထိ ဖမ်းဆီးခံနေရတယ်။ ဖမ်းခံရတဲ့ သူတွေကို တချို့ချမ်းသာတဲ့ မိဘတွေက ငွေပေးပြီး ပြန်သွားထုတ်ကြပေမယ့် သူတို့က ထုတ်မပေးဘူး။ လူပဲလိုချင်တာ ငွေမလိုချင်ဘူးဆိုပြီး ပြန်ပြောလာတယ်တဲ့။ ပြီးတော့ ညအချိန်ထွက်လည်တဲ့ လူငယ်တွေကိုလည်း လမ်းမှာတွေ့တဲ့နေရာတိုင်း ဖမ်းသွားကြတယ်။” ဟု နမ့်လန်မြို့ဒေသခံတစ်ဦးက ပြောပြသည်။
နမ့်လန်မြို့၌ ညပိုင်း(၈)နာရီနောက်ပိုင်းတွင် နေအိမ်အပြင်ထွက်သူမရှိသလောက်ဖြစ်နေပြီဖြစ်ကာ ထွက်ပြေးတိမ်းရှောင်နေကြသည့် မိသားစုဝင်များလည်းရှိသည်။ ယခင်က ယောကျာ်းသား(၂)ဦး ရှိသော အိမ်ထောင်စုများကို တပ်သားစုဆောင်းသော်လည်း ယခုအခါ သားယောကျာ်း(၁)ဦးရှိသော အိမ်များကိုလည်း ဝင်ရောက်ဖမ်းဆီးနေခြင်းဖြစ်သည်။
အခြားတစ်ဖက်တွင်လည်း ဖမ်းဆီးခံရသူသော လူငယ်များကို SSPP အဖွဲ့ထံ စစ်သင်တန်းသင်ကြားရမည်မဟုတ်ဘဲ UWSA အဖွဲ့ထံ စစ်မှုသင်တန်းတက်ရမည်ဟု ဒေသသတင်းအရင်းအမြစ်များကဆိုသည်။ ယနေ့တွင် သျှမ်းအင်အားကြီးတပ်(၂)တပ်ဖြစ်သည့် SSPP နှင့် RCSS ကြား ပဋိပက္ခတိုက်ပွဲကြောင့် သျှမ်းလူငယ်များအနေဖြင့် စစ်မှုထမ်းလိုစိတ်မရှိတော့ကြောင်း သတင်းရရှိသည်။