ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
ကရင်ပြည်နယ်၊ ဘုရားသုံးဆူမြို့၊ ပြောင်မထိန်ကျေးရွာအုပ်စု၊ ကြိမ်ချောင်းကျေးရွာရှိ DKBA (ဒေါနအနောက်ခြမ်း)၊ အမှတ် ၂ စစ်ကွပ်ကဲရေးနည်းဗျူဟာမှူး၊ ဗိုလ်မှူးကြီးစောအေဝမ်းရဲ့ နေအိမ်ကို ၂၀၂၃ ခုနှစ်၊ ဇန်နဝါရီ ၂၁ ရက် နံနက် ၁း၀၀ နာရီဝန်းကျင်တွင် စစ်ကောင်စီမှ ဂျက်ဖိုက်တာ တိုက်လေယာဉ် ၄ စီးနဲ့ ဗုံးကြဲတိုက်ခိုက်ခဲ့သည်ဟု Karen သတင်းဌာန ငွေမောင်းသံက ရေးသား ဖော်ပြခဲ့ပါသည်။
“ဒီမိုကရေစီအကျိုးပြုကရင့်တပ်မတော် (DKBA) ဟာ NCA လက်မှတ်ရေးထိုးထားခဲ့ပြီး အာဏာသိမ်းပြီးနောက်ပိုင်း ငြိမ်းချမ်းရေးအတွက် တွေ့ဆုံဆွေးနွေးမှုများ ရှိနေခဲ့ပါတယ်။ ဒီလိုအခြေအနေတွေ ရှိပါလျက်နဲ့ အခုလို လေကြောင်းကနေ အလစ်အငိုက် ဗုံးကြဲတိုက်ခိုက်မှုတွေ လုပ်ဆောင်လာတာဟာ အကြမ်းဖက်စစ်ကောင်စီအနေနဲ့ ဒီမိုကရေစီအကျိုးပြုကရင့်တပ်မတော် DKBA နဲ့ ငြိမ်းချမ်းရေးတည်ဆောက်မှုကို တစ်ဖက်သတ်ချိုးဖောက်လိုက်တာလို့ ဆိုရမှာ ဖြစ်ပါတယ်။” ဟု ရေးသားဖော်ပြထားပါသည်။
ဗိုလ်မှူးကြီးစောအေဝမ်းနေအိမ်နဲ့ ဘုရားကျောင်းဆောင် အပါအဝင်၊ အနီးဝန်းကျင်ရှိ အဆောက်အအုံများ၊ အလုပ်သမားတန်းလျားများ ဗုံးထိမှန်ပြီး နေအိမ်ခြံဝန်းအတွင်းက အဆောက်အအုံ ၂ လုံး ပြိုကျပျက်စီးသွားကြောင်း ဖော်ပြခဲ့ပါသည်။
DKBA ဗိုလ်မှူးကြီးစောအေဝမ်း၏ နေအိမ်ကို လေယာဉ်ပေါ်မှ ပွိုင့်ဖိုက်စက်လက်နှင့်ပါ ပစ်ခတ်သောကြောင့် နေအိမ် တခုလုံး ကြေမွပျက်ဆီးသွားခဲ့သည်ကို တွေ့မြင်ရပါသည်။
ဗိုလ်မှူးကြီး စောအေဝမ်းနဲ့ စစ်ကောင်စီ ဒုဥက္ကဋ္ဌ ဒုဗိုလ်ချုပ်မှူးကြီး စိုးဝင်းတို့ ယခင် NCA ငြိမ်းချမ်းရေး ဆွေးနွေးပွဲကာလ ရိုက်ကူးထားသော ဓာတ်ပုံနဲ့ NSPNC ဥက္ကဋ္ဌ ဒုဗိုလ်ချုပ်ကြီး ရာပြည့်တို့ အတူတကွ ရိုက်ကူးထားသော ဓာတ်ပုံများလည်း ကျည်ဆံထိမှန်ကာ ပျက်စီးသွားခဲ့ပါသည်။
