သျှမ်းပြည်မြောက်ပိုင်း၊ မန်တုံမြို့မှာ စက်တင်ဘာ လ(၃)ရက် ည ၁၁ နာရီခန့်အချိန်တွင် စစ်ကောင်စီတပ်က လေကြောင်းဖြင့် လာရောက်ဗုံးကြဲခဲ့ခြင်းဖြစ်ပြီး ပြည်သု(၂)ဦး ထိခိုက်ဒဏ်ရာရရှိကာ လက်ဖက်စက်ရုံအပါအဝင် လူနေအိမ်များပါ ထိခိုက်ပျက်စီးကြောင်း သိရသည်။
မန်တုံမြို့အစွန်၊ မြို့မရပ်ကွက်အတွင်းရှိ ပုဂ္ဂလိက လက်ဖက်ခြောက်အချိုခြောက်စက်ရုံနှင့် အိမ် ၅ လုံး ဗုံးထိမှန်ပျက်စီးပြီး ၎င်း စက်ရုံမှ အလုပ်သမား၂ ဦး ထိခိုက်ဒဏ်ရာရရှိကြောင်း ဒေသတွင်း သတင်းရင်းမြစ်မှ သိရသည်။
တိုက်ပွဲဖြစ်ပွားခြင်းမရှိဘဲ စစ်ကောင်စီက အရပ် သား ပြည်သူများရှိရာနေရာကို ဦးတည်ပြီးလေကြောင်း ဖြင့် အကြောင်းမဲ့တိုက်ခိုက်ရာ ယခုနှစ်ဇူလိုင်လလယ်မှ စက်တင်ဘာလ ၃ ရက်နေ့အထိ အရပ်သားပြည်သူ ၂၀ ကျော် သေဆုံးခဲ့ရပြီး ၅၀ ခန့် ထိခိုက်ဒဏ်ရာရရှိကာ နေအိမ်အဆောက်အအုံများ ထိခိုက်ပျက်စီးကြောင်း သိရသည်။
မန်တုံမြို့ကို ပြီးခဲ့သည့် ၂၀၂၃ခုနှစ် ဒီဇင်ဘာလ(၂၂) ရက်နေ့က တအာင်း TNLA က တိုက်ခိုက်သိမ်းပိုက်နိုင်ခဲ့ကြောင်း သိရသည်။
