သျှမ်းပြည်နယ်တောင်ပိုင်း၊ လွိုင်လင်ခရိုင်၊ လွိုင်လင်မြို့မှ ဒေသခံပြည်သူများက စက်သုံးဆီများ ဝယ်ယူရရှိရန် ညအချိန်ကတည်းက အိပ်စောင့်ပြီး တန်းစီနေရကြောင်း သိရသည်။
ယနေ့သြဂုတ်လ(၁၈)ရက် နံနက်ပိုင်း(၇)နာရီမှ စပြီး ဆီဗန့်ဆိုင်များက စတင်ရောင်းချပေးနေကာ ကားတစ်စီးလျှင် (၃)သောင်းဖိုးသာ ဝယ်ယူနိုင်ကြောင်း သိရသည်။
“ ဆီမရမှာကြောက်လို့ ကျွန်တော်တို့ ညကတည်းက လာပြီးအိပ်စောင့်တာ၊ ကားတစ်စီးကို (၃)သောင်းပဲရတယ်၊ ဒီနေ့ ဆီဝယ်ဖို့ လာတန်းစီတဲ့သူ တော်တော်များတယ် “ လို့ လွိုင်လင်မြို့နေသူ တစ်ဦးက Hsan Loi Voice ကို ပြောသည်။
စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ ယနေ့သြဂုတ်လ (၁၈)ရက်နေ့ ၏ သျှမ်းပြည်နယ်အတွက် ရည်ညွှန်းလက်လီစျေးနှုန်းများ ထုတ်ပြန်ချက်အရ 92 ဓါတ်ဆီ စျေးနှူန်းမှာ တစ်လီတာ ၃၀၉၅ ကျပ်၊ 95 စျေးနှုန်းမှာ တစ်လီတာ ကျပ် ၃၂၄၅ ရှိပြီး ရိုးရိုးဒီဇယ် တစ်လီတာမှာ ကျပ် ၂၇၂၅ ဖြစ်ကာ ဒီဇယ်အသန့်မှာ တစ်လီတာလျှင် ၃၃၁၅ ကျပ် ဖြစ်ကြောင်း သိရသည်။
ထို့အပြင် တောင်ကြီးမြို့မှာလည်း ဆီဗန့်ဆိုင်မှာ တိုးဝှေ့တန်းစီစောင့်ဆိုင်းဝယ်ယူနေရကာ ပြင်ပဆိုင်တွေမှာ ဓါတ်ဆီ တစ်လီတာကို ကျပ် ၉၀၀၀၊ ၁၀၀၀၀ ဖြင့် ရောင်းချကြကြောင်း သိရသည်။
စက်သုံးဆီ ပြတ်လပ်မှုသည် တစ်နိုင်ငံလုံးအတိုင်းအတာ ဖြင့် ကြုံတွေ့နေရပြီး တစ်နေ့ထက် တစ်နေ့ ပိုမိုဆိုးရွားလာကာ အဆိုပါ စက်သုံးဆီ ပြတ်လပ်မှုသည် ပြီးခဲ့သည့် ဇူလိုင်လ (၂၇)ရက်မှ စတင် လာခဲ့ကြောင်း သိရပါသည်။
