အရပ်သားပြည်သူများကို ပစ်မှတ်ထားပြီး စစ်ကောင်စီ၏ လေကြောင်းတိုက်ခိုက်မှုကို ဟန့်တားပေးရန် ညီနောင်မဟာမိတ်(၃)ဖွဲ့က ယမန်နေ့ သြဂုတ်လ(၆)ရက်နေ့က အိမ်နီးချင်း တရုတ်နိုင်ငံအား တောင်းဆိုတိုက်တွန်းထားကြောင်း သိရပါသည်။
တိုက်ပွဲဖြစ်ပွားခြင်းမရှိသည့် မြို့၊ ရွာများရှိ စျေး၊ စာသင်ကျောင်း၊ ဆေးရုံအစရှိသော လူထုအဆောက်အအုံများကို တိုက်လေယာဥ်များဖြင့် ဗုံးကြဲတိုက်ခိုက်ပြီး တိုင်းရင်းသားပြည်သူများကို သတ်ဖြတ်နေသော စစ်ကောင်စီတပ်၏ စစ်ရာဇဝတ်မှု ကျုးလွန်နေမှုများကို ဝိုင်းဝန်းတားဆီး ဟန့်တား ကြပါရန်ကိုလည်း အိမ်နီးချင်းဖြစ်သည့် တရုတ်ပြည်သူ့သမ္မတနိုင်ငံအား အဓိကထားပြီး နိုင်ငံတကာ မိသားစုများအားလုံးတို့ကို အထူးယုံကြည် အားကိုးစွာဖြင့် တောင်းဆိုတိုက်တွန်းထားသည်ဟု ညီနောင် မဟာမိတ်(၃)ဖွဲ့၏ ထုတ်ပြန်ချက်မှာ ဖော်ပြထားပါသည်။
ညီနောင်မဟာမိတ် (၃)ဖွဲ့တို့ ထိန်းချုပ်ထားသော နယ်မြေများအတွင်းမှ လောက်ကိုင်၊ သိန်းနီ၊ ကွတ်ခိုင်၊ နမ့်ဆန်နှင့် မြောက်ဦး အစရှိသည့် မြို့နယ်များတွင် စစ်ကောင်စီက တိုက်လေယာဥ်များဖြင့် ဖျက်အားပြင်းဗုံးများ ကြဲချကာ ပြည်သူလူထုများကို အဓိကပစ်မှတ်ထားပြီး တိုက်ခိုက်နေကြောင်း ထုတ်ပြန်ချက်မှာ ပါရှိပါသည်။