သျှမ်းပြည်နယ်မြောက်ပိုင်း ကျောက်မဲမြို့ရှိ စစ်ကောင်စီ၏ ကျန်ရှိနေသေးသော စကခ–၁ ၊ခလရ-၅၀၁/ ခလရ-၅၀၂ တပ်များအား TNLA နှင့်ပူးပေါင်းတပ်က (၅.၈.၂၀၂၄) ရက်နေ့ ည(၁၀)ဝန်းကျင်ခန့်တွင် ဝင်ရောက်သိမ်းပိုက်နိုင်ခဲ့ကြောင်း သိရသည်။ တိုက်ဆိုင်စွာဖြင့် ယမန်နေ့ညတွင်ပင် စစ်ကောင်စီခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြည်သူများထံသို့ နိုင်ငံပိုင်မီဒီယာမှတဆင့် မိန့်ခွန်းပြောပြီး နာရီပိုင်းအကြာတွင်ပင် ကျောက်မဲမြို့အား တော်လှန်ရေးအင်အားစုများက သိမ်းပိုက်ရရှိခဲ့သည်။
“ မနေ့တုန်းကတော့ တစ်မနက်လုံး စစ်ကောင်စီတပ်ဘက်က လေယာဉ်နဲ့ (၁၀) ကြိမ်ထက်မနည်း ဗုံးလာကြဲသွားသေးတယ်။ ညပိုင်းမိုးနည်းနည်းစချုပ်တာနဲ့ ၅၀၁/၅၀၂ ဘက်မှာ တိုက်ပွဲသံတွေကြားရပါတယ်။ ဒီမနက်တော့ ပစ်ခတ်သံတွေလည်းမကြားရတော့ပါဘူး။ မနက်ပိုင်းတော့ လူတွေနည်းနည်းပါးပါး အပြင်ထွက်လာကြတယ်။ အခုထိတော့ ငြိမ်သက်နေတုန်းပါပဲ။” ဟု ကျောက်မဲဒေသခံ ပြည်သူတစ်ဦးက ပြောသည်။
ကျောက်မဲမြို့၏ ခလရ-၅၀၁/၅၀၂ အား သိမ်းပိုက်ရရှိရန် TNLA နှင့် တော်လှန်ရေးအင်အားစုများက လနှင့်ချီ အချိန်ယူတိုက်ခိုက်ခဲ့ရသည်။