ယမန်နေ့ ဇူလိုင်လ (၂၈)ရက်နေ့ ညနေ ၅ နာရီခန့်အချိန်က သျှမ်းပြည်နယ်မြောက်ပိုင်း၊ လားရှိုးမြို့ ရပ်ကွက် (၇)၊ (၁၄)လမ်းရှိ နေအိမ်တစ်အိမ်ကို ဖောက်ထွင်းပြီး ကုန်ပစ္စည်းများ သယ်ဆောင်လာသူ အများအပြားကို လုံခြုံရေးယူထားသော MNDAA တပ်ဖွဲ့က စိစစ်တွေ့ရှိပြီး ချက်ချင်းဟန့်တားကာ အသိပညာပေးပြီး လုယက်သူများကို မောင်းထုတ်ခဲ့ကြောင်း သိရသည်။
အဆိုပါ နေအိမ်မှ ကုန်ပစ္စည်းများ ဝင်ရောက်ခိုးယူလုယက်သူ လူဦးရေ ၃၀ ဦးရှိကြောင်း MNDAA က ထုတ်ပြန်ထားပါသည်။
ခိုးယူလုယက်သူများကို မည်ကဲ့သို့ အခက်အခဲများ ကြုံတွေ့နေရပါစေ ခိုးယူခြင်းကို မပြုသင့်ကြောင်း၊ ခိုးယူလုယက်မှုကို ပြတ်ပြတ်သားသား တားမြစ်ထားပြီး ထပ်မံတွေ့ရှိပါက ပြင်းထန်စွာ အရေးယူမည်ဖြစ်ကြောင်း MNDAA ၏ စည်းရုံးရေးဦးစီးဌာန ဒုညွှန်ကြားရေးမှူးမှ ပြောကြားခဲ့ကြောင်း သိရပါသည်။
လက်ရှိ လားရှိုးမြို့တွင်း ကင်းလှည့်မှုများကို မဟာမိတ် လုံခြုံရေးတပ်ဖွဲ့များက တိုးမြှင့်ချထားပြီး စားနပ်ရိက္ခာပြတ်လပ်မှု၊ ဆေးဝါးထောက်ပံ့မှုစသည်ဖြင့် အခက်အခဲများ ကြုံတွေ့ရပါက MNDAAတပ်များထံ အကူအညီတောင်းခံနိုင်ပြီး မဟာမိတ်တပ်များကလည်း အဆိုပါပြဿနာကို ကူညီဖြေရှင်းပေးမည်ဖြစ်ကြောင်း ထုတ်ပြန်ထားပါသည်။
