သျှမ်းပြည်တောင်ပိုင်း၊ ညောင်ရွှေမြို့နယ် တိုက်ပွဲအတွင်း စစ်ကောင်စီလက်အောက်ခံ PNO ပြည်သူ့ စစ် စခန်းနှစ်ခု သိမ်းပိုက်ရရှိပြီး ပြည်သူ့စစ် ၁၅ ဦးထက်မနည်းသေဆုံးကာ လက်နက်ခဲယမ်းများ ရရှိကြောင်း ကရင်နီတော်လှန်ရေးအင်အားစု ထံမှ သိရသည်။
“ ညောင်ရွှေမြို့နယ်မှာရှိတဲ့ လွယ်လုံကျေးရွာအနီး PNO စခန်းနှစ်ခုကို ဇူလိုင် ၁၈ ရက်က သိမ်းပိုက်ရရှိခဲ့ပြီး လက်နက်ကြီး/ငယ် ၁၀လက်ကျော်ရတယ်” ဟု ကရင်နီတော်လှန်ရေးအင်အားစု သတင်းရင်းမြစ်မှ သိရသည်။
ညောင်ရွှေမြို့တောင်ဘက်ခြမ်းရှိ စံကားအင်းဒေသနှင့် ဆည်ခေါင်းကျေးရွာ တို့တွင်လည်း တိုက်ပွဲပြင်းထန်နေပြီး စစ်ကောင်စီက ဇူလိုင် ၂၀ ရက်တွင် လေကြောင်းတိုက်ခိုက်မှု ပြုလုပ်ခဲ့ကြောင်း သိရသည်။
စံကားအင်းဒေသမှာ တိုက်ပွဲဖြစ်ပွားမှုကြောင့် ဒေသခံတိုင်းရင်းသားများ တစ်သောင်းကျော် ဘေးလွှတ်ရာသို့ စစ်ရှောင်ကြကြောင်း သိရပါသည်။
