သျှမ်းပြည်နယ်မြောက်ပိုင်း ကိုးကန့်ဒေသ လောက်ကိုင်မြို့အား ယနေ့ နံနက်အစောပိုင်းက စစ်ကောင်စီ၏ တိုက်လေယာဉ်များ မြို့အတွင်း ဝင်ရောက်လာပြီး ၂ ကြိမ် ဗုံးကြဲတိုက်ခိုက်မှုပြုလုပ်ခဲ့ကြောင်း သိရသည်။
စစ်ကောင်စီ၏ ဗုံးကြဲတိုက်ခိုက်ခြင်း ခံရသော နေရာများသည် MNDAA နှင့် TNLA ထိပ်ပိုင်းခေါင်းဆောင်းများ မကြာခဏ တည်းခိုလေ့ရှိသော နေရာများဖြစ်သည်ဟုဆိုသည်။
စစ်ကောင်စီက လောက်ကိုင်မြို့လယ်ရှိ ဖူလီလိုက် ဟိုတယ်ပတ်ဝန်းကျင်ကို အဓိကပစ်ခတ်တိုက်ခိုက်ခြင်းဟု သတင်းရရှိသည်။ MNDAAက လားရှိုးမြို့မှ စစ်ကောင်စီစခန်းများကို ထိုးစစ်ဆင်တိုက်ခိုက်နေစဉ် စစ်ကောင်စီက လောက်ကိုင်ကို ဗုံးကြဲတိုက်ခိုက်ခြင်းဖြစ်သည်။
အဆိုပါ ဗုံးကြဲတိုက်ခိုက်မှုတွင် လူထိခိုက်သေဆုံးမှု သတင်းအတိအကျမသိရသေးပါ။ လက်ရှိတွင် သျှမ်းပြည်နယ်မြောက်ပိုင်း လားရှိုး၊ သီပေါ၊ မိုးကုတ်၊ ကျောက်မဲ နှင့် နောင်ချိုမြို့များ၌ စစ်ကောင်စီတပ်နှင့် TNLA ၊ MNDAA နှင့်အခြားတော်လှန်ရေး အင်အားစုများ တိုက်ပွဲပြင်းထန်နေလျက်ရှိသည်။
