သျှမ်းပြည်နယ်မြောက်ပိုင်း ကျောက်မဲမြို့အတွင်းရှိ ဌာနဆိုင်ရာ နေရာများစွာအား ယမန်နေ့ညပိုင်းနှင့် ယနေ့နံနက်ပိုင်းတွင် TNLA က သိမ်းပိုက်နေရာယူထားပြီဖြစ်သည်။ (၂၆.၆.၂၀၂၄)ရက်နေ့ နံနက်(၁၀)နာရီနောက်ပိုင်းတွင် ကျောက်မဲမြို့ မြို့မရဲစခန်းအား TNLA က ဆက်လက်ထိုးစစ်ဆင်လျက်ရှိပြီး ယခုအချိန်တွင် ရဲစခန်းကိုလည်း သိမ်းပိုက်ရရှိနိုင်သော အရိပ်အယောင်များရှိကြောင်း ကျောက်မဲမြို့တွင်း ပိတ်မိနေသော ပြည်သူတစ်ဦးက ပြောပြသည်။
“မနေ့ညကတော့ တိုက်ပွဲသံသဲ့သဲ့ပဲကြားရတယ်။ စကစ အဖွဲ့တွေအများကြီးသေတာတော့ မြင်ရတယ်။ ဘာလို့လဲဆိုရင် သူတို့ရဲ့အလောင်းတွေတင်လာတဲ့ကားက အိမ်ရှေ့ကနေဖြတ်သွားတာ တွေ့လိုက်ရတယ်။ တအာင်းဘက်ကလည်း အကျအဆုံးများလောက်တယ်။ လယ်ကွင်းထဲကနေ မြို့ထဲကို ဖြတ်ဝင်လာတဲ့အချိန် ၁၅ ယောက်လောက်ရှိတဲ့ TNLA အဖွဲ့တွေရှိဆီကို စစ်သားတွေက လက်နက်ကြီးတွေနဲ့လှမ်းထုတာ တော်တော်ထိတယ်။ အခုတော့ စစ်သားတွေက သူတို့တပ်ထဲကနေ လက်နက်ကြီးတွေနဲ့ရမ်းသမ်းထုတော့ လူနေအိမ်တွေအပေါ်ကျပြီး သေတဲ့သူလည်း သေတာပေါ့။
TNLA တွေကလည်း အရမ်းလည်တယ်။ လူတွေကို ထွက်မပြေးခိုင်းပဲနဲ့ လူနေအိမ်ကြားထဲကနေ ပြေးပြေးဝင်ပြီး တစ်ဖြေးဖြေးချင်း တစ်နေရာပြီး တစ်နေရာ ဝင်ဝင်နေရာယူလာတယ်။ ရဲစခန်းထဲမှာလည်း တိုက်နိုင်တဲ့စစ်သားတွေအဲ့လောက်မကျန်တော့ ဒီမနက်နဲ့တင် သူတို့သိမ်းနိုင်လောက်ပြီ။ ကျနော်တို့ကြောက်တာက စကစတွေ လေယာဉ်နဲ့ဗုံးလာကျဲမှာကိုပဲကြောက်တာ။ အခုထိ ပြည်သူတွေအကုန်လုံးက မြို့ထဲမှာပဲ ပိတ်မိနေကြတာ။”ဟု ကျောက်မဲဒေသခံပြည်သူတစ်ဦးက ပြောပြသည်။
ယနေ့ နံနက်ပိုင်း (၆)နာရီမှ (၁၀) နာရီအထိ ပြည်သူများအား ဈေးဝယ်ခွင့်နှင့် အပြင်ထွက်ခွင့် ခဏပေးပြီး ၁၀ နာရီနောက်ပိုင်း ကျန်ရှိနေသေးသော စစ်ကောင်စီတပ်စခန်းများအား TNLA က တဖြည်းဖြည်း ထိုးစစ်ဆင်ဝင်ရောက်တိုက်ခိုက်နေကြောင်း သိရသည်။
