သျှမ်းပြည်နယ်မြောက်ပိုင်း ကျောက်မဲမြို့အတွင်း ယမန်နေ့ ဇွန်လ (၁၄) ရက်နေ့က စစ်ကောင်စီအဖွဲ့ဝင်များသည် မြို့မဈေးအနီးတစ်ဝိုက်နှင့် မြို့အဝင်လမ်းများအတွင်း လမ်းသွားလမ်းလာများအား တားဆီးစစ်ဆေးမှုပြုလုပ်ခဲ့ကြောင်း သိရသည်။
ထိုသို့စစ်ဆေးရာတွင် လက်ကိုင်ဖုန်းများကိုလည်း စစ်ဆေးပြီး ဖုန်းအတွင်း VPN တွေ့ရှိသူများအား ဖမ်းဆီးခြင်းများပြုလုပ်ခဲ့သလို ငွေညစ်တောင်းခံမှုများလည်း ပြုလုပ်ခဲ့သည်။
“ စစ်သားတွေလား ရဲတွေလားမသိဘူး အရပ်ဝတ်တွေနဲ့ အုပ်စုလိုက်လမ်းမှာစောင့်ပြီး လမ်းသွားလမ်းလာတွေကို စစ်ဆေးကြတယ်။ မနေ့ကဆို လူငယ်(၄) ဦးကို ဖုန်းထဲမှာ VPN တွေ့လို့ဆိုပြီး ဖမ်းခေါ်သွားတယ်။ ထောင်ဒဏ် (၆)နှစ်ချမယ်ဆိုပြီးတော့လည်း ပြောသံတွေကြားနေရတယ်။ ပိုက်ဆံပေးနိုင်တဲ့ အသက်ကြီးပိုင်းတွေကိုတော့ ဒဏ်ငွေ (၂) သိန်းပေးခိုင်းပြီး ပြန်လွှတ်ပေးတာတွေရှိတယ်။” ဟု ကျောက်မဲဒေသခံ အမည်မဖော်လိုသူ အမျိုးသားတစ်ဦးက ပြောပြသည်။
သျှမ်းပြည်နယ်အတွင်း လားရှိုး၊ တောင်ကြီးအပြင် ကျောက်မဲမြို့တို့၌ VPN စစ်ဆေးမှုများ စတင်ပြုလုပ်လာခြင်းဖြစ်သည်။