သျှမ်းပြည်နယ်တောင်ပိုင်း တောင်ကြီးမြို့တွင် ယမန်နေ့ ဇွန်လ (၁၃) ရက်နေ့ကစပြီး စစ်ကောင်စီအဖွဲ့ဝင်နှင့်ရဲတပ်ဖွဲ့ဝင်များက မြို့တွင်းရှိ လူစည်ကားရာနေရာများ၌ ပြည်သူလူထုများ၏ ဖုန်းများကို စစ်ဆေးပြီး ငွေညစ်မှုများ ပြုလုပ်ခဲ့ကြောင်း သိရသည်။
ဆိုက်ဘာလုံခြုံရေး ယနေ့အထိ တရားဝင်အတည်ပြုနိုင်ခြင်းမရှိသေးသော်လည်း ရဲနှင့်စစ်သားများက ပြည်သူလူထု၏ ဖုန်းများအတွင်း VPN တွေ့ရှိပါက ခြိမ်းခြောက်ငွေညစ်ခဲ့ခြင်းဖြစ်သည်ဟုဆိုသည်။
တောင်ကြီးမြို့ မြို့မဈေး၊ Ocean Super Market ၊ ဗိုလ်ချုပ်ပန်းခြံ၊ တောင်ကြီးတက္ကသိုလ်အနီးရှိ ဧရာဝတီကဖေးလမ်းထောင့် စသည့်နေရာများ၌ စစစ်ကောင်စီအဖွဲ့ဝင်များက စောင့်ဆိုင်းစစ်ဆေးနေခြင်းဖြစ်သည်။
“ ရဲတွေ စစ်သားတွေ ဖုန်းယူမစစ်တော့တာ ကြာနေပြီဆိုတော့ လူတွေလည်းပုံမှန်အတိုင်းသွားလာနေကြပြီပေါ့။ အခုမှ ဖုန်းတွေကောက်စစ်ပြီး ဖုန်းထဲက ဓာတ်ပုံတွေရော VPN ဆော့ဝဲလ် တွေ့ရင်ရော ဖမ်းမယ်ဆိုပြီး ခြိမ်းခြောက်ပြောနေတာလေ။ အဖမ်းမခံချင်ရင် ငွေဒဏ်ပေးဆောင်ရမယ်လို့လည်းပြောသံကြားနေရတယ်။” ဟု တောင်ကြီးဒေသခံတစ်ဦးက ပြောပြသည်။
လက်ကိုင်ဖုန်းအတွင် VPN တစ်ခုတွေ့ရှိပါက (၅) သောင်းကျပ်ပေးဆောင်ခိုင်းပြီး၊ (၅) ခုတွေ့ရှိပါက (၂)သိန်းခွဲကျပ်အထိ ပေးဆောင်ခိုင်းကြောင်း စုံစမ်းသိရှိရသည်။
