စစ်မှန်သော ပြည်ထောင်စု ဒီမိုကရေစီရရှိရေးအတွက် တွေ့ဆုံနွေးဆွေးခြင်းက မဖြစ်နိုင်၍ စစ်ရေးဖြင့်သာ ဖြေရှင်းရတော့မည်ဖြစ်ကြောင်း SSPP/SSA ဒုဗိုလ်ချုပ်ကြီး စဝ်ခွန်ဆိုင်က ပြောဆိုခဲ့ကြောင်း SSPP info က ယနေ့ညနေပိုင်း သတင်းတွင် ဖော်ပြခဲ့သည်။
၎င်း၏ပြောဆိုချက်အရ “ နိုင်ငံရေးကို နိုင်ငံရေး လမ်းစဉ်နဲ့ စားပွဲဝိုင်းပေါ်မှာ တွေ့ ဆုံဆွေးနွေးခဲ့တာ ပင်လုံစာချုပ် စချုပ်ကထဲကနေဆို နှစ်ပေါင်း ၇၇ နှစ်ကြာပါပြီ။ စစ်အုပ်စု အဆက်ဆက်က တိုင်းရင်းသား လူနည်းစုတွေကို ဝါးမြိုပြီး ပင်လုံ စာချုပ်မှာ သဘောတူ လက်မှတ်ရေးထိုးထားတဲ့ အချက်တွေကို မလိုက်နာခဲ့ကြပါဘူး။ စစ်ကောင်စီတွေ အာဏာသိမ်းပြီး နောက်မှာလဲ မြန်မာနိုင်ငံရဲ့ နိုင်ငံရေး အခြေအနေဟာ စား ပွဲဝိုင်းပေါ် ဆွေးနွေး ညှိနှိုင်း အဖြေရှာဖို့ နည်းလမ်းတွေ လုံးဝ မဖြစ်နိုင်တော့တဲ့ အနေအထား ဖြစ်ခဲ့ပါတယ်။
အခြေအနေ လုံးဝ မပေးနိုင် တော့တဲ့ အဆုံး လက်နက် ကိုင် တော်လှန်မယ့် လမ်းစဉ်ကို ရွေးချယ်ခဲ့ရတာ ဖြစ်ပါတယ်” ဟု ဒုတိယ ဗိုလ်ချုပ်ကြီး စဝ်ခွန်ဆိုင်က ပြောဆိုကြောင်း ဖော်ပြထားသည်။
အဆိုပါပြောဆိုမှုအရ SSPP အနေဖြင့် စစ်ကောင်စီအား တိုက်ပွဲဆင်နွဲတော့မည်ဟု သုံးသပ်ရသည်။
ဒါ့အပြင် ဒုဗိုလ်ချုပ်ကြီးစဝ်ခွန်ဆိုင်က “တွေဝေနေလို့ မဖြစ်တော့ပါဘူး ၊ အခု ကျနော်တို့ ဖြစ်ချင်တာက နိုင်ငံရေး ပြ ဿနာကို နိုင်ငံရေး နည်းလမ်းနဲ့ တွေ့ဆုံ ဆွေးနွေး အဖြေရှာတာ ဖြစ်ပါတယ်။ အခုချိန်မှာတော့ အဖြေရှာဖို့ လမ်း စဉ်ဟာ လုံးဝ မရှိတော့ပါဘူး။ ဒါ့ကြောင့် တိုက်ပွဲ ဖြစ်ရပါတော့မယ်။ မနက်ဖန် စစ်မဖြစ်ချင်ရင် ဒီနေ့ စစ်ဖြစ်ရပါမယ်။ မနက်ဖန် အခက်မကြုံဖို့ အတွက် ဒီနေ့ ရုန်းကန်ရပါမယ်” ပြောသည်။
ယခုဖော်ပြလာသည့် သတင်းစကားကြောင့် သျှမ်းပြည်နယ်မြောက်ပိုင်း၌ စစ်ကောင်စီတပ်နှင့် SSPP တို့ တိုက်ပွဲဖြစ်ပွားလာမည်ကို ဒေသခံများက စိုးရိမ်လျက်ရှိသည်။
Credit & SSPP info