သျှမ်းပြည်နယ်မြောက်ပိုင်းတွင် ယမန်နေ့ ဧပြီလ(၂၄)ရက်နေ့ ညပိုင်းက မိုးသည်းထန်စွာ ရွာသွန်းခဲ့သည်။ မိုးရွာသွန်းမှုကြောင့် သျှမ်းပြည်နယ်မြောက်ပိုင်း လားရှိုး-သီပေါ လမ်းပေါ်တွင် တည်ဆောက်ထားသော စဉ့်အင်ယာယီတံတားဖြတ်သန်းရန် အခက်အခဲဖြစ်ပေါ်ကာ လမ်းပိတ်ဆို့မှုဖြစ်ပေါ်နေသည်။
“မနေ့က ညနေပိုင်းနဲ့ ညပိုင်းမှာ မိုးအရမ်းရွာတယ်လေ။ ညနေပိုင်းတုန်းကဆိုရင် မိုးသီးတွေတောင်ပါတယ်။ မိုးရွာတော့ စဉ့်အင်ယာယီတံတားသွားတဲ့လမ်းက မြေလမ်းဖြစ်တဲ့အတွက် ပွတ်တွေထကုန်တယ်။ ကားလမ်းမကြီးကနေ ယာယီတံတားအထိဆိုရင် (၂၅)မိနစ်လောက်ဝင်ရတယ်။ ဒီလမ်းက မြေနီလမ်းဖြစ်တဲ့အတွက် မိုးတွင်းဆိုရင်တော့ တံတားဖြတ်ဖို့ တော်တော်အခက်အခဲဖြစ်လိမ့်မယ်။” ဟု နောင်ချို-လားရှိုး ခရီးသည်တင်ယာဉ်လိုင်း(တော်ဝန်ချို)မှ ကားဆရာတစ်ဦးက ပြောပြသည်။
သျှမ်းပြည်နယ်မြောက်ပိုင်းတွင် တိုက်ပွဲဖြစ်ပွားမှုကြောင့် တံတားများစွာ ဖျက်ဆီးခြင်းခံထားရပြီး ယနေ့အထိ ပြန်လည်တည်ဆောက်နိုင်ခြင်းမရှိသေးပါ။ အချို့နေရာများတွင် ယာယီတံတားများဖြင့် တိုင်းရင်းသားလက်နက်ကိုင်များက တည်ဆောက်ထားသော်လည်း ယာဉ်ဖြတ်သန်းခကို အဆက်မတန်ကောက်ခံလျက်ရှိသည်။ အဆိုပါယာယီတံတားများကို ဖြတ်သန်းရန်အတွက်လည်း မြေနီလမ်းအတိုင်းသွားရသည့်အတွက် မိုးရွာသီတွင် ယာဉ်များပုံမှန်အတိုင်းသွားလာနိုင်ရန် အခက်အခဲဖြစ်ပေါ်မည်ဖြစ်သည်။
