သျှမ်းပြည်နယ်တောင်ပိုင်း ပအိုဝ်းကိုယ်ပိုင်အုပ်ချုပ်ခွင့်ရဒေသအတွင်း စစ်ကောင်စီတပ်+PNO ပူးပေါင်းအဖွဲ့နှင့် PNLA + PDF တို့ပူးပေါင်းအဖွဲ့တို့ တိုက်ပွဲဆက်လက်ပြင်းထန်နေလျက်ရှိသည်။ ပင်လောင်းမြို့နယ်၊ ဟိုပုံးမြို့နယ်နှင့် ဆီဆိုင်မြို့နယ်အတွင်း တိုက်ပွဲဖြစ်ပွားနေပြီး ဒေသခံများစွာ နေအိမ်ကိုပြန်နိုင်ခြင်း မရှိသေးပါ။
ဒါ့အပြင် စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုကြောင့် ပြည်သူ့လူထုနေအိမ်များစွာလည်း ပျက်စီးခဲ့ရပြီဖြစ်သည်။
“ တိုက်ပွဲတွေက ဆီဆိုင်ဘက်မှာရော ဟိုပုံးဘက်မှာရော အခုထိဆက်ဖြစ်နေတုန်းဆိုတော့ ဘယ်သူမှ အိမ်ကိုမပြန်ရဲသေးဘူး။ တချို့တွေလည်း အိမ်ကိုလက်နက်ကြီးထိလို့ ပျက်စီးကုန်ပြီ ပြန်စရာအိမ်မရှိတော့ဘူး။ တိုက်ပွဲတွေက ပင်လောင်းမြို့နယ်အထိကို ကူးစက်လာလို့ ပိုဆိုးလာမှာကိုပဲကြောက်ရတယ်။ ဒါတောင်မနေ့က စစ်ကောင်စီဘက်ကနေ ဆီဆိုင်ကပြည်သူတွေကို အိမ်ပြန်ဖို့ပြောနေသေးတယ်။ ဘယ်သူမှမပြန်ရဲကြသေးဘူး။”
အခြားတစ်ဖက်တွင်မူ ပအိုဝ်းဒေသအတွင်း စစ်ပွဲဖြစ်သော်လည်း တောင်ကြီးမြို့ ပအိုဝ်းတပေါင်းကွင်းအတွင်း ၇၅ကြိမ်မြောက် ပအိုဝ်းအမျိုးသားနေ့ အကြိုအဖြစ် ဘောလုံးပြိုင်ပွဲကျင်းပနေကြောင်း သိရသည်။
