သျှမ်းပြည်နယ်မြောက်ပိုင်း လားရှိုးမြို့နယ်အတွင်း ဆောင်းတွင်းအအေးဒဏ်ကြောင့် လမ်းဘေးနေအိမ်ခြေရာမဲ့များ အအေးပတ်ပြီး သေဆုံးမှုများ ပြန်လည်ဖြစ်ပွားလျက်ရှိသည်။
ယမန်နှစ်ဆောင်းတွင်းကလည်း လားရှိုးမြို့၌ အအေးပတ်ပြီးသေဆုံးသော ပိုင်ရှင်မဲ့အလောင်းများစွာ တွေ့ရှိခဲ့သည်။
“ ပြီးခဲ့တဲ့ ဇန်နဝါရီလ(၁၄) ရက်နေ့က လားရှိုးမြို့ ရေကန်တောင် တောင်ပတ်လမ်းဘက် အလိုတော်ပြည့်ဘုရားနားက လျှိုထဲမှာ အလောင်းတစ်လောင်းတွေ့တယ်။ ဇန်နဝါရီလ(၁၅) ရက်နေ့ကလည်း လားရှိုးမြို့ ရပ်ကွက်(၇) ရွှေလဝင်းစားသောက်ဆိုင်နား မြောင်းထဲမှာ ပုပ်ပွသေဆုံးနေတဲ့ အလောင်းတစ်လောင်းထပ်တွေ့တယ်။ သူတို့အလောင်းတွေကိုတော့ ကျနော်တို့လူမှုကူညီရေးအသင်းကလူတွေပဲ စုပေါင်းပြီး သယ်ယူပေးခဲ့ပါတယ်။ မနှစ်ကလည်းဆောင်းတွင်းတစ်တွင်းလုံး အအေးပတ်ပြီးသေဆုံးသူနဲ့ မူးယစ်ဆေးအသုံးလွန်ပြီး သေဆုံးတဲ့ ပိုင်ရှင်မဲ့အလောင်းတွေ အများကြီး တွေ့ခဲ့ရတယ်။” ဟု လားရှိုးလူငယ်များ လူမှုကူညီရေးအသင်း အဖွဲ့ဝင်တစ်ဦးက ပြောပြသည်။
လားရှိုးမြို့တွင် မြောက်ပိုင်းမဟာမိတ်နှင့် စစ်ကောင်စီတို့ တိုက်ပွဲဖြစ်ပွားမည်ကို စိုးရိမ်သောကြောင့် ဒေသခံများစွာ ထွက်ပြေးတိမ်းရှောင်နေကြကြောင်း ဆက်စပ်သိရသည်။
