စစ်ကောင်စီတပ်နှင့်မြောက်ပိုင်းမဟာမိတ် (၃) ဖွဲ့ဖြစ်သည့် MNDAA၊ TNLA၊ AA တို့သည် ယမန်နေ့ (၁၁.၁.၂၀၂၄) ရက်နေ့တွင် တရုတ်နိုင်ငံ ကူမင်းမြို့၌ တတိယအကြိမ် တွေ့ဆုံဆွေးနွေးခဲ့ကြပြီး ယာယီအပစ်အခတ်ရပ်စဲရေး သဘောတူညီလက်မှတ်ရေးထိုးခဲ့ကြောင်း သတင်းရရှိသည်။ တရုတ်နိုင်ငံ၏ ကြားဝင်စေ့စပ်မှုဖြင့် ပြုလုပ်သော အဆိုပါ ဆွေးနွေးမှုတွင် စစ်ကောင်စီဘက်က အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) မှ ဒုဗိုလ်ချုပ်ကြီး မင်းနိုင် က ဦးဆောင်တက်ရောက်ခဲ့ပြီး မြောက်ပိုင်းမဟာမိတ် (၃) ဖွဲ့က အတွင်းရေးမှူးများက တက်ရောက်ခဲ့သည်ဟု သိရသည်။
ဒါ့အပြင် တရုတ်နိုင် – မြန်မာနိုင်ငံဆိုင်ရာ အထူးကိုယ်စားလှယ် မစ္စတာ တိန့်ရှီကျင်းက တက်ရောက်ခဲ့သည်ဟုဆိုသည်။ အဆိုပါဆွေးနွေးမှုတွင် စစ်ကောင်စီတပ်နှင့်မြောက်ပိုင်းမဟာမိတ်တို့ အပစ်အခတ်ရပ်စဲရေး သဘောတူညီပြီး နယ်စပ်ကုန်သွယ်ရေး ပြန်ဖွင့်ရေးအတွက် ဆွေးနွေးခဲ့ကြောင်း သတင်းရရှိသည်။