သျှမ်းပြည်နယ်မြောက်ပိုင်း ကျောက်မဲမြို့နယ်နှင့် သီပေါမြို့နယ်တို့တွင် ယမန်နေ့ ညပိုင်းက စစ်ကောင်စီတပ်နှင့် မြောက်ပိုင်းမဟာမိတ်တို့ တိုက်ပွဲပြင်းထန်စွာ ဆက်လက်ဖြစ်ပွားခဲ့ပြီး ပြည်သူလူထုများအနေဖြင့် အရေးကြီးကိစ္စမှလွဲ၍ ခရီးသွားလာခြင်းမပြုကြရန် သက်ဆိုင်ရာအဖွဲ့အစည်းများက တိုက်တွန်းထားသည်။
ကျောက်မဲမြို့နှင့် ချောင်းချောက်ရွာကြား လမ်းမကြီးတစ်ချောက်၌ စစ်ကောင်စီတပ်နှင့်မြောက်ပိုင်းမဟာမိတ်အဖွဲ့တို့ ယမန်နေ့ညကတစ်ညလုံး တိုက်ပွဲဖြစ်ပွားခဲ့သလို ယနေ့နံနက်ပိုင်းအထိ တိုက်ပွဲသံများကြားနေရဆဲဖြစ်သည်။
ဒါ့အပြင် ကျောက်မဲမြို့နယ် ခိုမုန်းကျေးရွာအနီးရှိ ဆီဆိုင်တန်းတစ်လျောက်တွင်လည်း တစ်ညလုံး လက်နက်ကြီး လက်နက်ငယ်များဖြင့် အပြန်အလှန် တိုက်ခိုက်မှုရှိခဲ့ပြီး ခိုမုန်းရွာမှ ဘုန်းတော်ကြီးတစ်ပါး ကျည်ထိဒဏ်ရာရရှိခဲ့သည်ဟုဆိုသည်။
သီပေါမြို့နယ် ကျင်သီတံတားကိုလည်း ယမန်နေ့ (၂၆.၁၁.၂၀၂၃) ရက်နေ့တွင် မြောက်ပိုင်းမဟာမိတ်အဖွဲ့မှ ပြန်လည်တိုက်ခိုက်သိမ်းပိုက်ထားပြီး ပြည်သူများအနေဖြင့် ကျောက်မဲ-သီပေါ ခရီးသွားလာခြင်း မပြုလုပ်နိုင်သေးကြောင်း သတင်းရရှိသည်။
