သျှမ်းပြည်နယ်မြောက်ပိုင်း ကျောက်မဲမြို့နယ် ဂုတ်တွင်းလမ်းပိုင်းအား ယနေ့(၂၉.၁၀.၂၀၂၃) ရက်နေ့က စတင်ပြီး လမ်းမကြီးပေါ်အား သစ်ပင်ခုတ်လှဲပြီး ပိတ်ဆို့ထားပြီဖြစ်ကြောင်း သိရသည်။
ညနေပိုင်းကစတင်ပြီး ဂုတ်တွင်းတစ်လျောက် လက်နက်ကြီးသံများ ထွက်ပေါ်လာပြီး စစ်ရဟတ်ယာဉ်များလည်း အသွားအပြန်ပြုလုပ်နေသည်ဟု ဆိုသည်။
“ မနက်အစောပိုင်းတုန်းကတော့ နောင်ချိုမြို့နယ် ကျောက်ကြမ်းရွာဘက်မှာ မဟာမိတ်အဖွဲ့တွေက ဝင်သိမ်းလိုက်ကြတယ်ပြောတယ်။ အဲ့ဒီနောက်ပိုင်း ရဟတ်ယာဉ်တွေက ဗုံးလာလာလာကြဲသွားတယ်။ ဒီညနေပိုင်းတော့ ဂုတ်တွင်းတစ်ဝိုက်မှာ လက်နက်ကြီးသံတွေ ဆက်တိုက်ထွက်ပေါ်နေတယ်။ ဘယ်ဘယ်ကပစ်လိုက်တဲ့လက်နက်ကြီးလဲတော့ မသိဘူး။ နောင်ပိန်တိုက်နယ်ထဲက ကျေးရွာတော်တော်များများဆီကိုတော့ မဟာမိတ်အဖွဲ့တွေက ဝင်ရောက်နေရာယူပြီး အားဖြည့်ထားကြပြီ။ ကျေးရွာထဲကျန်နေတဲ့ ရွာသူရွာသားတွေရော ဘုန်းကြီးတွေရော တစ်ယောက်မှရွာပြင်ပေးမထွက်တော့ဘူး။” ဟု နောင်ပိန်ကျေးရွာမှ အမည်မဖော်လိုသူတစ်ဦးကပြောပြသည်။
ယနေ့ညနေပိုင်းတွင် နောင်ချို-ကျောက်မဲလမ်းပိုင်း၌ သွားလာနေကြသော ခရီးသွားများအား မြောက်ပိုင်းမဟာမိတ်အဖွဲ့လမ်းတစ်ဝက်တွင် တားဆီးပြီး နောက်ပြန်လှည့်ခိုင်းလျက်ရှိကြောင်း သတင်းရရှိသည်။
