ယမန့်နေ့ အောက်တိုဘာလ(၉)ရက်နေ့ ည(၁၁)နာရီခွဲခန့်တွင် ကချင်ပြည်နယ် KIA ဌာနချုပ်အနီးရှိ မုန်လိုင်ခက်စစ်ဘေးရှောင်စခန်းအား စစ်ကောင်စီတပ်မှ ဗုံးကြဲတိုက်ခိုက်ခဲ့ကြောင်း သတင်းရရှိသည်။
စစ်ကောင်စီ၏ ဗုံးများသည် စစ်ဘေးရှောင်စခန်းအပေါ်တည့်တည့်ကို ကျရောက်ပေါက်ခဲ့ပြီး လူအိပ်ချိန်ဖြစ်သောကြောင့် စစ်ဘေးရှောင်အများအပြား ထိခိုက်သေဆုံးခဲ့ရသည်။ ထိုအထဲတွင် လသားအရွယ်ကလေးငယ်အပါအဝင် အမျိုးသမီးနှင့်ကလေးငယ်များစွာပါဝင်သည်။ သေဆုံးသူ (၂၇)ဦးရှိသည်ဟု ယနေ့နံနက်ပိုင်းက ကချင်ပြည်နယ်သတင်းအရင်းအမြစ်များက ဖော်ပြခဲ့သည်။
ဒါ့အပြင် ထိခိုက်ဒဏ်ရာရရှိသူ (၅၀)ဦးကျော်ရှိပြီး အချို့မှာ ဒဏ်ရာပြင်းထန်ကြသည်ဟုဆိုသည်။ ယမန်နှစ် အောက်တိုဘာလ(၂၃)ရက်နေ့ ၂၀၂၂ ခုနှစ်တွင်လည်း စစ်ကောင်စီမှ ကချင်ပြည်နယ် ဖားကန့်မြို့နယ် အနန့်ပါကျေးရွာတွင် ကျင်းပပြုလုပ်သော တေးဂီတဖော်ဖြေပွဲအား ဗုံးကြဲတိုက်ခိုက်ခဲ့ပြီး ကချင်အနုပညာရှင်များအပါအဝင် စုစုပေါင်း (၆၃)ဦး သေဆုံးခဲ့ရသည်။
