ယနေ့ ဩဂုတ်လ (၂၃) ရက်နေ့ နံနက်ပိုင်းတွင် စစ်ကောင်စီ၏ မြန်မာနိုင်ငံရဲတပ်ဖွဲ့မှ တရုတ်နိုင်ငံရဲတပ်ဖွဲ့ထံ အွန်လိုင်းလိမ်လည်သူတရုတ်နိုင်ငံသား (၂) ဦးအား လွှဲပြောင်းပေးခဲ့သည်ဟု မြန်မာနိုင်ငံဆိုင်ရာ တရုတ်သံရုံးက ထုတ်ပြန်ခဲ့သည်။ အွန်လိုင်းလိမ်လည်သူ (၂) ဦးအား ရန်ကုန်အပြည်ပြည်ဆိုင်ရာ လေဆိပ်မှတဆင့် တရုတ်နိုင်ငံသို့ ဖမ်းဆီးပို့ဆောင်သည်ဟု ဖော်ပြထားသည်။
၎င်းတို့ (၂) ဦးသည် လိမ်လည်သည့်ပြစ်မှုကျူးလွန်ကြောင်း သံသယရှိသူဖြစ်ပြီး အဆိုပါ (၂) ဦးအနက် (၁) ဦးသည် လောင်းကစားနှင့်လိမ်လည်မှုအဖွဲ့၏ အဖွဲ့ခေါင်းဆောင်ဖြစ်ကြောင်း သိရသည်။
မြန်မာနိုင်ငံရှိ နယ်စပ်မြို့များဖြစ်သည့် မူဆယ်၊ တာချီလိတ်၊ မိုင်းလား၊ လောက်ကိုင်၊ မြဝတီမြို့များတွင် အဆိုပါအွန်လိုင်းလိမ်လည်သည့်အဖွဲ့. (ကြားဖျံ) များစွာ ရှိနေသည်မှ ကြာပြီဖြစ်သော်လည်း ထိရောက်သည့် ဖမ်းဆီးအရေးယူနိုင်မှုများ မတွေ့ရပါ။ မြန်မာနိုင်ငံသားများစွာလည်း အဆိုပါ အွန်လိုင်းဂိမ်းလိမ်လည်မှုများကြောင့် ဘဝပျက်ကြသော မိသားစုများစွာရှိကြောင်း သိရသည်။
