ကချင်ပြည်နယ် အင်းတော်ကြီးဒေသ အင်းတော်ကြီးကန်အရှေ့ဘက်ခြမ်းရှိ နမ့်မော်ကန်ကျေးရွာတွင် ကလေးငယ်(၂၀၀)ဦးကျော် ကူးစက်မြန်ဖျားနာရောဂါတစ်ခု ဖြစ်ပွားလျက်ရှိကြောင်း သတင်းရရှိသည်။ တုတ်ကွေးရောဂါလိုဖြစ်ပြီး ကူးစက်မှုနှုန်းလည်း မြင့်မားလျက်ရှိကာ တစ်ရက်ကလေးဦးရေ (၅၀)ဦးခန့် ဖျားနာကြသည်။
“နမ့်မော်ကန်ကျေးရွာက ကလေးတွေ အဖျားကူးနေကြတာက ဒီတစ်ပတ်ထဲမှာပဲကို ကလေးတွေ ရာကျော်လောက်ကို ဖျားနေကြတာ။ ကျောင်းမှာကူးကြရင်း နေ့တိုင်းအဖျားတွေကူးလာကြတာ ရွာက စာသင်ကျောင်းမှာဆိုရင် (၄)တန်းတစ်ခန်းလုံး အဖျားကူးကုန်ပြီး တစ်တန်းလုံးကျောင်းတောင်မသွားနိုင်ကြဘူးပြောတယ်။ ရွာက ကျေးလက်ကျန်းမာရေးဆေးခန်းတွေမှာလည်း တစ်ရက်တစ်ရက် ဆေးခန်းလာပြကြတဲ့ ကလေးတွေ (၅၀-၆၀)ယောက်လောက်တောင်ရှိတယ်။ တော်တော်များများကတော့ ကိုယ်ပူပြီး နှာစေး ချောင်းဆိုး၊ ခေါင်းကိုက်ခေါင်းမူးကြတယ်။ လက္ခဏာကတော့ တုတ်ကွေးလက္ခဏာတွေပေါ့လေ။ ဒီအနီးနား ပတ်ဝန်းကျင်ကရွာတွေမှာလည်း ကလေးတွေ ဖျားနေကြတယ်လို့ပြောတယ်။” ဟု အင်းတော်ကြီးဒေသ နမ့်မော်ကန်ရွာဒေသခံတစ်ဦးက ပြောပြသည်။
ဒါ့အပြင် ကလေးငယ်များပါမကဘဲ မိသားစုတစ်ခုတွင် တစ်ဦးဖျားပါက ကျန်သောသူများကိုပါ ကူးစက်ပြီး တစ်အိမ်လုံးဖျားကြကြောင်း သိရသည်။ အများအားဖြင့် (၁၂)နှစ်အောက် ကလေးငယ်များက အများဆုံး ကူးစက်နေကြကြောင်း သတင်းရရှိသည်။
