သျှမ်းပြည်နယ်မြောက်ပိုင်း ကျောက်မဲမြို့နယ် နောင်ပစ်ကျေးရွာအဝင်လမ်းတွင် ယမန်နေ့ ဩဂုတ်လ (၄) ရက်နေ့ နံနက် (၁၀) နာရီခန့်တွင် နောင်ချိုမြို့ ၁၁၄၊ ၁၁၅ တပ်ရင်းမှ ကင်းလှည့်လာသည့် စစ်ကောင်စီကား တိုက်ခိုက်ခံရပြီး အများအပြား သေဆုံးကြောင်း သတင်းရရှိသည်။
တိုက်ခိုက်ခံရသော စစ်ကောင်စီတပ်သား (၁၄) ဦး၊ သေဆုံးပြီး (၃) ဦး ဒဏ်ရာရရှိကာခဲ့သည်ဟု ဒေသခံများထံက သိရသည်။
“နောင်ချိုကနေ တက်လာတဲ့ စစ်ကောင်စီကားကို နောင်ပစ်ရွာအဝင်လမ်းနားမှာ ချောင်းပြီးပစ်ခံရတယ်။ အများကြီးသေတယ်။ တချို့တွေဆိုရင် ခြေတွေပြတ် လက်တွေပြတ်ထွက်ပြီး လမ်းမပေါ်မှာ ပြန့်ကျဲနေတာပဲ။ တစ်ယောက်ကတော့ သေနေတဲ့ အလောင်းပုံအောက်မှာ ပုန်းနေခဲ့လို့ လွတ်သွားတယ်ပြောတယ်။ စစ်ကောင်စီတပ်ရဲ့ လက်နက်တွေကိုတော့ လာပစ်သွားတဲ့အဖွဲ့က အကုန်သိမ်းသွားတယ်။ ကျနော်တို့အထင်တော့ TNLA နဲ့ PDF တို့ ပေါင်းပြီး တိုက်ခိုက်တယ်လို့ ထင်ရတာပဲ။ အထိနာသွားတဲ့ စစ်သားတွေ စစ်ကြောင်းနဲ့ပြန်လာခဲ့ပေမယ့် အခုထိတော့ တိုက်ပွဲသံမကြားရသေးဘူး။” ဟု အဆိုပါကျေးရွာအနီးတွင် နေထိုင်သော ဒေသခံက ပြောပြသည်။
တိုက်ပွဲဖြစ်ပွားခြင်းမဟုတ်ဘဲ ကင်းလှည့်လာသည့် စစ်ကောင်စီတပ်ကို TNLA နှင့် PDF ပူးပေါင်းအဖွဲ့ဟု ယူဆရသော လက်နက်ကိုင်အဖွဲ့များက ကြားဖြတ်တိုက်ခိုက်ခြင်းဖြစ်ကြောင်း သတင်းရရှိသည်။