ထိုင်း-ကရင်ပြည်နယ် နယ်စပ် မြဝတီမြို့တဖက်ကမ်းရှိ ထိုင်းနိုင်ငံ မဲဆောက်မြို့နယ်မြေအတွင်း၊ ရတ်ချ်အုထစ်လမ်းမပေါ်ရှိ ရေမီတာတချို့ကို လိုက်လံခိုးယူနေသည့် မြန်မာပြည်သားတဦးအား ထိုင်းရဲတပ်ဖွဲ့က ဝိုင်းဝန်းဖမ်းဆီးခဲ့သည်။
ရေမီတာများကို လိုက်လံခိုးယူနေသူ၏အမည်သည် နိုင်လင်းအောင် အသက် ၃၈ နှစ်ဟု သိရပါသည်။
သြဂုတ်လ ၁ ရက်နေ့ကလည်း မဲဆောက်မြို့နယ်၊ ဆွဲထဝီးချိုင်းလန်းလမ်းမတလျှောက် မယ့်ပါနယ်မြေဘက်၌ လိုက်လံဖြုတ်ယူခဲ့သည်။
ခိုးယူပြီးသည့် ရေမီတာများကို ပလစ်တစ် ပစ္စည်းအဟောင်းဆိုင်သို့ သွားရောက် ရောင်းချပေးခြင်းဖြစ်သည်။
အလားတူ ထိုင်းနိုင်ငံ နိုင်ငံခြားခရီးသွားဧည့်သည်များ အလည်အပတ်များသည့် ပတ္တရားကမ်းခြေမြို့၌ ဂတ်စ်မီးခြစ်သေနတ်ကိုအသုံးပြုပြီး နောက်ပြောင် ရယ်စရာ အကြမ်းဖက်လုယက်သည့် ရုပ်သံတိုရိုက်ကူးသည့် မြန်မာပြည်သား ၂ ဦးကိုလည်း ထိုင်းရဲတပ်ဖွဲ့က အကြမ်းဖက်မှုကို အားပေးအားမြောက်မှုဖြင့် ဖမ်းဆီးထိန်းသိမ်းထားသည်ဟု သတင်းရရှိပါသည်။
အဆိုပါ ရုပ်သံရိုက်ကူးပြီး လူမှုကွန်ယက်ပေါ်တင်ခဲ့သော မြန်မာပြည်သား ၂ ဦးအနေနှင့် ထောင်ဒဏ် ၁ လ ထိ သို့မဟုတ် ဒဏ်ငွေ ဘတ် ၁ သောင်း ပေးရနိုင်ခြေရှိပါသည်။
Ref: Maesod media, Bangkok post