တောင်ကြီးမြို့နယ်အတွင်း ရှိမြေယာများ ခွင့်ပြုချက်တစ်စုံတစ်ရာမရှိပဲ facebook ပေါ်မှ တစ်ဆင့်ရောင်းချခြင်းသည် တည်ဆဲဥပဒေနည်းလမ်းများအတိုင်းဆောင်ရွက်ထားခြင်းမရှိသဖြင့် တရားမဝင်ကြောင်း စစ်ကောင်စီလက်အောက်ခံ တောင်ကြီးမြို့နယ်စီမံအုပ်ချုပ်ရေးအဖွဲ့က ဇူလိုင် ၁၈ က အသိပေးကြေညာစာ ထုတ်ပြန်ထားသည်။
“ မြေကွက်တွေက အရောင်းအဝယ် နားထားကြတာတစ် လကျော်ပြီပဲ ၊ ဥပဒေကသူတို့လက်ထဲမှာဆိုတော့ လုပ် ကိုင်ရတာကျပ်လာတာပေါ့” ဟု တောင်ကြီးမြို့အိမ်ခြံမြေအကျိုးဆောင်တစ်ဦးကပြောသည်။
တောင်ကြီးမြို့နယ်အတွင်းရှိမြေများအား ခွင့်ပြုချက်မရှိပဲ facebook online media များမှတစ်ဆင့် ရောင်းချနေမှုများအပေါ် ဝယ်ယူပါကသတ်မှတ်ထားသည့် တည်ဆဲဥပဒေနည်းလမ်းများအတိုင်း ဆောင်ရွက်ထားခြင်းမရှိသဖြင့် နောင်တစ်ချိန်၌ ပြည်သူများအနေဖြင့် နစ်နာဆုံးရှုံးမှုများဖြစ်ပေါ် လာနိုင်ကြောင်းနှင့် မြေယာလုပ်ပိုင်ခွင့် ပိုင်ဆိုင်ခွင့်ရရှိထားသူများအနေဖြင့် မြေယာဥပဒေနှင့်အညီ ခွင့်ပြုချက်ရရှိရေး တင်ပြဆောင်ရွက်ပြီး ခွင့်ပြုချက်ရရှိမှသာ လုပ်ကိုင်ဆောင်ရွက်သွားရန် နှင့်လိုက်နာခြင်းမရှိပါက တည်ဆဲဥပဒေ နှင့်အညီ အရေးယူမည်ဖြစ်ကြောင်း ထုတ်ပြန်ချက်တွင် ပါရှိသည်။
တောင်ကြီးမြို့နယ်အတွင်း အစိုးရစီမံခန့်ခွဲပိုင်ခွင့်ရှိသော မြေ၊ လယ်ယာမြေ ၊ မြေလွတ်မြေရိုင်း ၊ ကျန်အခြားမြေ သစ်တောမြေများ၌ ခွင့်ပြုချက် တစ်စုံတစ်ရာမရှိပဲမြေကွက်ဖော်ထုတ်ရောင်းချခြင်း ၊ ကျောက်တိုင်စိုက်ထူခြင်း ၊ အုတ်တံတိုင်းကာရံခြင်း ၊ အဆောက်အဦးဆောက်လုပ်ခြင်းများကို တားမြစ်သည့် အသိပေးကြေညာစာကို စစ်ကောင်စီက ဇွန်လမှစတင်ထုတ်ပြန်ခဲ့သည်။
ယင်းသို့သတိ ပေးစာများထုတ်ပြန်ပြီးနောက် ဖာမွန်းကျေးရွာအုပ်စုအတွင်းနေထိုင်သည့် လူနေအိမ်တော် တော်များများဖယ်ရှား ဖျက်ပေးခဲ့ရကြောင်း တောင်ကြီးမြို့ခံများထံမှ သိရှိရပါသည်။