မြေမြုပ်မိုင်းထိပြီး ဒဏ်ရာရခဲ့ကြသည့် သျှမ်းပြည်နယ်မြောက်ပိုင်း ကျောက်မဲခရိုင်အတွင်းက ဒေသခံပြည်သူများအား (JMFA) မှ ကူညီထောက်ပံ့ငွေများ လှူဒါန်း
14 June 2023 (4:21 PM)
သျှမ်းပြည်နယ်မြောက်ပိုင်း ကျောက်မဲခရိုင်အတွင်းရှိ မြေမြုပ်မိုင်းများနင်းမိကာ ထိခိုက်ဒဏ်ရာရရှိခဲ့ကြသော ဒေသခံပြည်သူများအား Japan Myanmar Friendship Association (JMFA) မှ ယခုတစ်ပတ်အတွင်း ကူညီထောက်ပံ့ငွေများ ပေးခဲ့ကြောင်း သိရသည်။
JMFA မှ ပေးအပ်လာသော ကူညီထောက်ပံ့ငွေများအား ဒေသခံ လူမှုရေးအသင်းအဖွဲ့ဝင်များက မြေပြင်အထိ သွားရောက်ကူညီပေးခဲ့သည်။ ကူညီထောက်ပံ့မှုတွင် သီပေါမြို့နယ် တောင်မြို့ရပ်ကွက်က ကိုသန်းဇော်ဦး၊ ကျောက်မဲမြို့နယ် ပုံးလုံကျေးရွာမှ လုင်းဝိလိန္ဒ၊ ကျောက်မဲမြို့နယ် နမ့်မန်းကျေးရွာမှ နန်းသန်းအေးနှင့် ကျောက်မဲမြို့နယ် ခိုယောင်းကျေးရွာမှ စိုင်းလိန် စုစုပေါင်း (၄)ဦးအတွက် တစ်ဦးလျှင်(၅သိန်းကျပ်) စီ ထောက်ပံ့ကူညီခဲ့သည်ဟု ဆိုသည်။
၎င်းတို့သည် RCSS နှင့် မြောက်ပိုင်းမဟာမိတ်တိုက်ပွဲပြီးနောက်ပိုင်း ကျေးရွာတွင် ထောင်ထားသော မြေမြုပ်မိုင်းများ နင်းမိပြီး ထိခိုက်ဒဏ်ရာရရှိခဲ့ကြသူများဖြစ်သည်။
