သျှမ်းပြည်နယ်မြောက်ပိုင်း လားရှိုးမြို့နယ် ဟက်ကာကျေးရွာတွင် ဇွန်လ (၁၀) ရက်နေ့ ယနေ့ နံနက် ၁ နာရီ ၂၃ မိနစ်ခန့်က မိုးရွာသွန်းမှုကြောင့် လူနေအိမ်ပေါ် အုတ်တံတိုင်းပြိုကျပြီး နေအိမ်အတွင်းရှိ မိသားစုဝင် (၄) ဦး အုတ်တံတိုင်းပိမိကာ သေဆုံးခဲ့ကြောင်း သတင်းရရှိသည်။
သေဆုံးသူများသည် ကလေးငယ် (၃) ဦး အမျိုးသမီး တစ်ဦးဖြစ်ပြီး ၎င်းတို့၏ အလောင်းကို လားရှိုးမြို့နယ်မီးသတ်ဦးစီးမှူးဦးစီးသည့် ရှာဖွေကယ်ဆယ်ရေးတပ်ဖွဲ့ဝင်များ၊ လားရှိုးမြို့နယ်ကြက်ခြေနီတပ်ဖွဲ့၊လားရှိုးလူငယ်များလူမှုကူညီရေးအသင်း၊ ကမ်းလင့်လက်ပရဟိတအသင်း၊ ပေးသောလက်လူမှုကူညီရေးအသင်း၊ ကမ္ဘောဇနာရေးနှင့်ဆန်လှူအသင်းတို့နှင့် ပူးပေါင်းကာရှာဖွေ သယ်ထုတ်ပြီး လားရှိုးမြို့ ဆေးရုံကြီး ရင်ခွဲရုံသို့ ပို့ဆောင်ထားကြောင်း သိရသည်။
