သျှမ်းပြည်နယ်မြောက်ပိုင်း ကျောက်မဲမြို့နယ် ရပ်ကွက်(၄) ဗိုလ်ချုပ်အောင်ဆန်းလမ်း နမ့်စောင်းငေါဝ်းချောင်းအတွင်း အမျိုးသမီးတစ်ဦး ဆိုင်ကယ်မှောက်ပြီးပြုတ်ကျမှု ယနေ့ (၅.၅.၂၀၂၃) ရက်နေ့ နံနက် (၂) နာရီ ကျော်ခန့်၌ ဖြစ်ပွားခဲ့သည်။
“ ကျနော်တို့ဆီကို ဆက်သွယ်ပြီး အကြောင်းကြားလာတာကတော့ မနက် ၂ နာရီကျော်ကျော်လောက်ဖြစ်မယ်။ ကျနော်တို့ရောက်တဲ့အချိန်မှာတော့ သူကမှောက်ရပ်နဲ့ ရေထဲမှာနစ်ပြီး သေနေပြီပေါ့လေ။ ဆိုင်ကယ်ကတော့ လမ်းမပေါ်မှာမှောက်ပြီး လဲနေတယ်။ ကျောက်မဲမြို့ (၁) ရပ်ကွက် အုတ်ကျင်းမှာနေတဲ့သူပါ။ မနက်ဈေးအနားမှာဖြစ်တာဆိုတော့ ကျနော့်အထင်တော့ ဈေးဝယ်ဖို့သွားရင်း ဖြစ်တယ်လို့ပဲထင်တယ်။” ဟု ၎င်းအလောင်းကို သွားရောက်ကူညီသယ်ဆောင်ပေးခဲ့သူ နမ့်ခုံးပရဟိတ အဖွဲ့ဝင်တစ်ဦးက ပြောပြသည်။
အဆိုပါ အမျိုးသမီးအလောင်းကို နံနက်(၂း၄၅) နာရီခန့်၌ နမ့်ခုံးရှမ်းများပရဟိတ လူမှုကူညီရေးအသင်းက ရေထဲမှ ဆွဲထုတ်နိုင်ခဲ့ကာ ကျောက်မဲမြို့နယ် ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။
