(၂၁.၄.၂၀၂၃) ရက်နေ့ ည(၈း၂၀) မိနစ်ခန့်တွင် သျှမ်းပြည်နယ်မြောက်ပိုင်း လားရှိုးမြို့နယ် လားရှိုး-သိန္နီ ပြည်ထောင်စုလမ်းမကြီး (၉)မိုင်လမ်းခွဲ၌ တရုတ်ပဲကြီးလှော်များ တင်ဆောင်လာသည့် (၁၂)ဘီး ကုန်တင်ကားကြီး မတော်တဆတိမ်းမှောက်မှုဖြစ်ပွားခဲ့ကြောင်း သတင်းရရှိသည်။
ယာဉ်တိမ်းမှောက်မှုကြောင့် ယာဉ်ပေါ်လိုက်ပါစီးနင်းလာသူ အမျိုးသမီးတစ်ဦး ကားတွင်း၌ညှပ်မိပြီး သေဆုံးခဲ့သည်။ ဒါ့အပြင် ယာဉ်မောင်းဖြစ်သူအမျိုးသားတစ်ဦးလည်း ထိခိုက်ဒဏ်ရာရရှိခဲ့သည်။ ၎င်းတို့ (၂)ဦးသည် လင်မယားဖြစ်ကြောင်းလည်း သိရသည်။
“ကျနော်တို့ လားရှိုးလူငယ်များလူမှုကူညီရေးအသင်းကို ည(၈)နာရီကျော်ကျော်လောက်မှ ဖုန်းဆက်ပြီးအကြောင်းကြားလာတယ်။ (၉)မိုင်လမ်းခွဲမှာ (၁၂)ဘီးကား မှောက်လို့ လာကူညီပေးဖို့ ဆက်သွယ်လာတာပေါ့လေ။ ကျနော်တို့ ရောက်သွားတဲ့အချိန်မှာ ကားပေါ်မှာပါလာတဲ့ အမျိုးသမီးတစ်ဦးကတော့ ကားထဲမှာညှပ်မိပြီး သေဆုံးနေပြီ။ သူ့အလောင်းကိုလည်း ခက်ခက်ခဲခဲ ထုတ်ယူခဲ့ရတယ်။ ယာဉ်မောင်းဖြစ်တဲ့အမျိုးသားတစ်ဦးကလည်း ထိခိုက်ဒဏ်ရာရထားတာဆိုတော့ လားရှိုးပြည်သူ့ဆေးရုံကို ကျနော်တို့အဖွဲ့ကပဲ ပို့ဆောင်ပေးခဲ့ရတယ်။” ဟု လားရှိုးလူငယ်များ လူမှုကူညီရေးအသင်းမှ အဖွဲ့ဝင်တစ်ဦးက ပြောပြသည်။
အဆိုပါကားက တရုတ်နိုင်ငံထုတ်ပဲကြီးလှော်များကို တင်ဆောင်လာခြင်းဖြစ်ပြီး အရှိန်မထိန်းနိုင်ဘဲ တိမ်းမှောက်ခြင်းဖြစ်သည်။ လမ်းပေါ်ပြန့်ကျဲလျက်ရှိသည့် ပဲကြီးလှော်များကို ဖြတ်သွားဖြတ်လာသော ခရီးသွားပြည်သူများမှ ဝိုင်းဝန်းရှင်းလင်းပေးခဲ့ကြောင်း သိရသည်။
