သျှမ်းပြည်မြောက်ပိုင်း ကျောက်မဲမြို့နယ် ပရိယတ္တိ ဓမ္မပါလ စာမေးပွဲ စတုတ္ထနေ့ ကျင်းပပြုလုပ်နေကြောင်း ကျောက်မဲမြို့နယ် သံဃာတော်များထံကတဆင့် သိရသည်။
“ မြို့ထဲမှာတော့ ခိုအုံကျောင်းမှာ ကျင်းပပါတယ်၊ ပုံဝိုးအုပ်စုမှာတော့ ပုံဝိုးကျောင်းပေါ့၊ နောင်ပိန်အုပ်စုမှာတော့ နောင်ပိန်ကျောင်းမှာ ကျင်းပပါတယ်” ဟု ကျောက်မဲမြို့အမှတ် ၂ ရပ်ကွက်မှ နမ့်စလင်းကျောင်း ဆရာတော် အရှင်ဥာဏဝရက မိန့်ပါသည်။
သံဃာတော်များအတွက် ဆွမ်းသုံးဆောင်ရန် ယခင်က ရပ်မိရပ်ဖများကို အားကိုးအားထားပြုခဲ့ရသော်လည်း ယခုနှစ်၌ စီမံခန့်ခွဲမှုဆိုင်ရာ အခက်အခဲများစွာ ကြုံတွေ့ရခြင်း၊ သျှမ်းပြည်မြောက်ပိုင်းရှိ တိုင်းရင်းသားလက်နက်ကိုင်အဖွဲ့အစည်းများ၏ တပ်သားသစ်စုဆောင်းရာ ရပ်မိရပ်ဖများ အဝေးသို့ ထွက်ပြေးတိမ်းရှောင်သွားခြင်းကြောင့် ဆွမ်းခဲဖွယ်အတွက် အခက်အခဲများစွာ ဖြစ်ပေါ်စေကြောင်း ကြားသိရပါသည်။
ထို့ကြောင့် လာရောက်ဖြေဆိုသည့်ကျောင်းတိုက်မှ သံဃာတော်များ ကိုယ်ထူကိုယ်ထ ဆွမ်းသုံးလာကြရန်သာ စီစဉ်လိုက်ကြရပြီး စာမေးပွဲလာရောက်ဖြေဆိုခိုင်းကြသည်ဟု ဆိုသည်။
ပုံဝိုးကျောင်းတွင် လာရောက်ဖြေဆိုသည့် သံဃာတော်ပေါင်း ၂၁၀ ပါး၊ နောင်ပိန်လုံကျေးရွာအုပ်စုကျောင်းတွင် ၅၈ ပါး၊ ခိုအုံကျောင်းတွင် ၅၆၀ ပါး စုစုပေါင်း ၈၁၅ ပါး လာရောက်ဖြေဆိုနေခြင်းဖြစ်သည်။
ဖြေဆိုရသည့်ဘာသာရပ် ၇ ဘာသာရှိပြီး ယနေ့ အင်္ဂလိပ်စာကို ဖြေကြားနေကြရာ ဘာသာရပ် ၃ မျိုးသာ ကျန်ရှိကြောင်း ပြောပါသည်။
၂၀၂၃ ခုနှစ်၊ ဖေဖော်ဝါရီလ ၂၅ ရက်နေ့၌ ဖြေဆိုမှု ပြီးဆုံးမည်ဖြစ်ကြောင်း သိရသည်။
