စစ်အာဏာရှင်စနစ်ကို တော်လှန်ရာတွင် သူတလူငါမင်း လုပ်ဆောင်၍မရဘဲ တခြားသော တိုင်းရင်းသားလူမျိုး အစုအဖွဲ့များနှင့် လက်တွဲတိုက်ထုတ်ကြရမည်ဟု ကရင်အမျိုးသားအစည်းအရုံး (KNU) ဥက္ကဌ စောမူတူးစေးဖိုးက (၇၄) နှစ်မြောက် ကရင်အမျိုးသား ခုခံတော်လှန်ရေးနေ့မိန့်ခွန်းတွင် ထည့်သွင်းပြောကြားခဲ့သည်။
ဒါ့အပြင် နိုင်ငံရေး ကြိုးပမ်းမှုများအတွက် လမ်းပိတ်သွားတာ၊ ရပ်တန့်သွားတာတွေ ဖြစ်ပေါ်လာပါက လက်နက်ကိုင်ခုခံတော်လှန်ရေးပေါ်ပေါက်လာမည်ဖြစ်ပြီး ၎င်းဖြစ်စဉ်သည် အံ့ဩစရာမဟုတ်သည့် နိုင်ငံရေးအမှန်တရားဖြစ်စဉ်ဖြစ်သည်ဟု ပြောကြားသည်။
မိမိတို့၏ နိုင်ငံရေး ရည်မှန်းချက်များဖြစ်သည့် တရားမျှတမှု၊ တန်းတူညီမျှမှုနှင့် ကိုယ်ပိုင်ပြဌာန်းခွင့်များ အောင်မြင်သည်အထိ ကြိုးပမ်းဆောင်ရွက်ရမည်ဖြစ်သလို၊ နိုင်ငံ၏ ဖွဲ့စည်းပုံအခြေခံဥပဒေကို ဖယ်ဒရယ်ဒီမိုကရေစီနိုင်ငံတစ်နိုင်ငံ၏ ဥပဒေအဖြစ် ပြောင်းလဲပစ်ရမည်ဖြစ်ကြောင်း KNU ဥက္ကဌ စောမူတူးစေးဖိုးက မိန့်ခွန်းတွင် ထည့်သွင်းပြောကြားခဲ့သည်။
အောက်ပါဖော်ပြသော ဓာတ်ပုံသည် ကရင်အမျိုးသားအစည်းအရုံး (KNU) ဒူးပလာယာခရိုင်တွင် ၇၄ နှစ်မြောက် ကရင်တော်လှန်ရေးနေ့ အခမ်းအနား ကျင်းပနေသည့် မြင်ကွင်းဖြစ်သည်။
photo credit & KIC