သျှမ်းပြည်နယ်မြောက်ပိုင်း လားရှိုးမြို့နယ်တွင် TNLA နှင့် စစ်ကောင်စီတပ်တို့ ယမန်နေ့ ဇန်နဝါရီလ (၂၉) ရက်နေ့က တိုက်ပွဲပြန်လည်ဖြစ်ပွားခဲ့ကြောင်း သိရသည်။ စစ်ကောင်စီတပ်မှ လားရှိုးမြို့နယ်ရှိ ခမရ(၅၀၄) တပ်ရင်းမှ TNLA တပ်စခန်းသို့ လက်နက်ကြီး စတင်ပစ်ခတ်ရာမှတဆင့် တိုက်ပွဲပြန်လည်ဖြစ်ပွားခြင်း ဖြစ်သည်ဟု ဆိုသည်။
စစ်ကောင်စီတပ်၏ အင်အား (၆၀) ခန့်သည် လားရှိုးမြို့နယ် နမ့်မော်ကျေးရွာမှ မန်ကောင်ရွာသို့ စစ်ကြောင်းထိုး ဝင်ရောက်လာပြီး TNLA တပ်မဟာ (၆) စစ်ဒေသ၊ TNLA တပ်ရင်း (၅၉၅) တပ်စခန်းသို့ လက်နက်ကြီးဖြင့် ပစ်ခတ်ရာမှ (၂) ဖက်တပ်များ (၂) နာရီကြာ အပြန်အလှန်ပြန်လည်ပစ်ခတ်ခဲ့သည်။
(၂)ဖက်တပ်များ၏ အထိအခိုက် အကျအဆုံးကို မသိရသေးဘဲ ဇန်နဝါရီလ (၂၉) ရက်နေ့ ည (၆) နာရီခန့်တွင် ပစ်ခတ်မှုများ ပြန်လည်ရပ်တန့်သွားပြီး ယနေ့တွင်လည်း စစ်ရေးတင်းမာလျက်ရှိကြောင်း သတင်းရရှိသည်။