Non CDM ဝန်ထမ်းများအား ၎င်းတို့အပေါ် ဌာနဆိုင်ရာများ မည်သို့ သဘောထားရှိကြောင်း စစ်ကောင်စီမှ စာရွက်များဖြန့်ဝေပြီး စစ်တမ်းကောက်မှုတစ်ခု ပြုလုပ်နေသည်ဟုဆိုသည်။ အဆိုပါ စစ်တမ်းတွင် စစ်ကောင်စီအပေါ် စိတ်သဘောထားနှင့် ဌာနဆိုင်ရာ အောက်ခြေဝန်ထမ်းများ၏ သဘောထားများကို ဖြည့်သွင်းစေလျက်ရှိသည်။
“နာမည်တော့ မဖြည့်ခိုင်းပေမယ့် ရာထူးတွေ ဌာနတွေပါနေတော့ သူတို့အကြောင်း မကောင်းဘယ်သူကရေးရဲမလဲ။ ဖြည့်ဆိုလို့သာ ဖြည့်လိုက်ရတာ အမှန်တရားတော့ ရမှာမဟုတ်ပါဘူး။ ဘာအတွက်လည်းဆိုတာတော့ သေသေချာချာမသိဘူး ကျနော်တို့ ရုံးက ဝန်ထမ်းတိုင်းတော့ အကုန်ဖြည့်ခိုင်းတာပါပဲ။” ဟု သျှမ်းပြည်နယ်တောင်ပိုင်း တောင်ကြီးမြို့ရှိ ဝန်ထမ်းတစ်ဦးက ပြောပြသည်။
ဒါ့အပြင် CDM လုပ်ထားသော ဝန်ထမ်းများစာရင်းကို စစ်ကောင်စီမှ စာရင်းပြန်လည်ပြုစုလျက်ရှိပြီး လိုက်လံဖမ်းဆီးနေကြောင်းလည်း သိရသည်။