ပြီးခဲ့တဲ့ ၂၀၂၅ ခုနှစ် အထွေထွေရွေးကောက်ပွဲမှာ လုံခြုံရေးအခြေအနေကြောင့် ရွေးကောက်ပွဲ မကျင်းပနိုင်ခဲ့တဲ့ မြို့နယ်အချို့ အပါအဝင် စုစုပေါင်း မြို့နယ် ၃၄ ခုမှာရှိတဲ့ လစ်လပ်မဲဆန္ဒနယ် ၅၅ နေရာ အတွက် လာမယ့် ၂၀၂၇ ခုနှစ် ဧပြီလ ၄ ရက်နေ့မှာ ကြားဖြတ်ရွေးကောက်ပွဲ ကျင်းပသွားမယ်လို့ ပြည်ထောင်စုရွေးကောက်ပွဲကော်မရှင် (UEC) က ယမန်နေ့က ထုတ်ပြန်လိုက်ပါတယ်။
ယခု ကြားဖြတ်ရွေးကောက်ပွဲ ကျင်းပမယ့် ဒေသတွေထဲမှာ သျှမ်းပြည်နယ်အတွင်းက ကျောက်မဲ၊ မိုင်းဖြတ်နဲ့ မိုင်းပန် မြို့နယ်တို့ အပါအဝင် ကချင်၊ ချင်း၊ မွန်၊ စစ်ကိုင်း၊ မန္တလေး၊ ရန်ကုန်၊ နေပြည်တော်၊ ဧရာဝတီ၊ ပဲခူးနဲ့ တနင်္သာရီ စတဲ့ တိုင်း/ပြည်နယ်အတွင်းက မြို့နယ်တွေလည်း ပါဝင်ပါတယ်။
ကြားဖြတ်ရွေးကောက်ပွဲ ကျင်းပမယ့် မဲဆန္ဒနယ် ၅၅ နယ်ထဲမှာ ပြည်သူ့လွှတ်တော် မဲဆန္ဒနယ် ၃၄ နယ်၊ အမျိုးသားလွှတ်တော် မဲဆန္ဒနယ် ၅ နယ်နဲ့ တိုင်းဒေသကြီး/ပြည်နယ်လွှတ်တော် မဲဆန္ဒနယ် ၁၆ နယ်တို့ ပါဝင်တယ်လို့ သိရပါတယ်။
သတိပြုစရာအချက်အနေနဲ့ ယခင် ၂၀၂၅ ခုနှစ် ရွေးကောက်ပွဲတုန်းက လုံခြုံရေးအကြောင်းပြချက်နဲ့ ရွေးကောက်ပွဲ မကျင်းပနိုင်ခဲ့တဲ့ မြို့နယ် ၅၆ ခုအနက် ၉ ခုသာ ယခု ကြားဖြတ်ရွေးကောက်ပွဲ စာရင်းမှာ ပြန်လည်ပါဝင်လာတာဖြစ်ပြီး အထူးသဖြင့် ရခိုင်ပြည်နယ်မှာ ယခင်ရွေးကောက်ပွဲ မကျင်းပနိုင်တဲ့ မြို့နယ် ၁၀ ခုလုံးဟာ ယခုကြားဖြတ်ရွေးကောက်ပွဲ ကျင်းပမယ့် စာရင်းမှာ ပါဝင်လာခြင်း မရှိသေးတာကို တွေ့ရပါတယ်။
