ရခိုင်ပြည်နယ်က ကျောက်တော်၊ မြောက်ဦး၊ ကျောက်ဖြူနဲ့ ဝီရဌာနေ မြို့နယ် ၄ ခုကို စစ်ကောင်စီက နိုဝင်ဘာလ ၁ ရက်တည်းမှာ လေကြောင်းဗုံးကြဲ တိုက်ခိုက်ခဲ့တာကြောင့် မွေးကင်းစကလေးတစ်ဦး အပါအဝင် ၁၂ ဦး သေဆုံးပြီး တစ်နှစ်အထက် ကလေးငယ် အပါအဝင် လူကြီး လူငယ် စုစုပေါင်း ၃၂ ဦး ထိခိုက်ဒဏ်ရာရရှိခဲ့တယ်လို့ အာရက္ခတပ်တော် AA က ထုတ်ပြန်ထားပါတယ်။
နိုဝင်ဘာလ ၁ ရက်နေ့ ညနေ ၅ နာရီ ၂၅ မိနစ်အချိန်ခန့်က ကျောက်တော်မြို့နယ်၊ ဝါးတောင်ကျေးရွာနဲ့ ပန်းဖဲ ချောင်းကျေးရွာကို ဆက်သွယ်ထားတဲ့ တံတားကို ဂျက်တိုက်လေယာဥ်နဲ့ ဗုံးကြဲတိုက်ခိုက် ခဲ့တာကြောင့် လမ်းသွားလမ်းလာ အပြစ်မဲ့ပြည်သူ ၇ ဦး သေဆုံးပြီး ၇ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။
အလားတူ ယင်းနေ့ ညနေ ၅ နာရီ ၂၇ မိနစ်အချိန်ခန့်မှာ မြောက်ဦးမြို့နယ်၊ ထမ္မရာဇ်ရပ်ကွက်ရှိ ယာယီ ဆေးကုခန်းနဲ့ သားဖွားဆောင် တို့ကို စစ်ကောင်စီတပ်က ဂျက်တိုက်လေယာဥ် ၂ စီးနဲ့ Cluster ဗုံး ၄ လုံး ကြဲချတိုက်ခိုက်ခဲ့တာကြောင့် မွေးကင်းစ ကလေးငယ်တစ်ဦးအပါအဝင် အပြစ်မဲ့ပြည်သူ ၅ ဦး သေဆုံးပြီး ၉ ဦး ထိခိုက်ဒဏ်ရာရရှိခဲ့တယ်လို့ AA က ဖော်ပြထားပါတယ်။
ဒါ့အပြင် ကျောက်ဖြူမြို့နယ်၊ စနဲမင်းပြင်ရွာကိုလည်း ဂျက်တိုက်လေယာဥ် ၂ စီးနဲ့ ဗုံးကြဲတိုက်ခိုက်တာ ကြောင့် ၁၁ ဦး ထိခိုက်ဒဏ်ရာရပြီး နေအိမ်အဆောက်အအုံ ထိခိုက်ပျက်စီးခဲ့သလို ယင်းနေ့ နံနက် အစောပိုင်းက ဝီရဌာနေ (ပေါက်တော)မြို့ပေါ်နဲ့ ရွာချောင်းကြီးကျေးရွာတို့ကို Y-12 လေယာဥ်နဲ့ ဗုံးကြဲ တိုက်ခိုက်ခဲ့တာကြောင့် ပြည်သူ ၅ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။
စစ်ကောင်စီတပ်က ရခိုင်ပြည်နယ်ရှိ ကျောက်တော်၊ မြောက်ဦး၊ ကျောက်ဖြူနဲ့ ဝီရဌာနေ မြို့နယ်တွေမှာ ရှိတဲ့ အများပြည်သူသွားလာရာ လမ်း၊ တံတား၊ ဆေးရုံ၊ ဆေးခန်းများနဲ့ လူနေရပ်ကွက်တွေကို လေကြောင်းကနေ ရှေ့ဆင့်နောက်ဆင့် ဗုံးကြဲတိုက်ခိုက်ပြီး အကြမ်းဖက်မှုတွေ ဆက်တိုက် ကျူးလွန်နေတယ်လို့ AA က ထုတ်ပြန်ထားပါတယ်။
Photo – AA Info Desk