၅ နှစ်ကျော်ကြာမှ မိခင်ဖြစ်သူ ဒေါ်အောင်ဆန်းစုကြည်နဲ့ စကားပြောခွင့်ရတယ်လို့ သားဖြစ်သူ ကင်မ်အဲရစ်က သူ့ရဲ့ လူမှုကွန်ယက်စာမျက်နှာမှာ ရေးသားထားပါတယ်။
“မေမေ့အသံကို ပြန်ကြားရတာ ကျွန်တော့်အတွက် စကားလုံးတွေနဲ့ ဖော်ပြလို့မရလောက်အောင် အဓိပ္ပာယ်ရှိပါတယ်၊မေမေနဲ့ ကျွန်တော့်ဘက်က ရပ်တည်ပြီး အားပေးခဲ့ကြသူအားလုံးကို လှိုက်လှိုက် လှဲလှဲ ကျေးဇူးတင်ပါတယ်။
အားလုံးရဲ့တောင်းဆိုသံတွေကြောင့် ဒီအခွင့်အရေး ရလာခဲ့တာလို့ ကျွန်တော် ယုံကြည်ပါတယ်။ မေမေ လွတ်မြောက်တဲ့အထိ ဆက်လက်တောင်းဆိုပေးကြပါ” လို့ ဖော်ပြထားပါတယ်။
ဒေါ်အောင်ဆန်းစုကြည်ကို ဒီကနေ့ အောက်တိုဘာလ ၂၂ ရက် မွန်းလွဲပိုင်း ၂ နာရီ ၃၀ မိနစ်မှ ၂ နာရီ ၅၀ မိနစ်အထိ မိနစ် ၂၀ ကြာ သားငယ်ဖြစ်သူ Mr. Kim Aris (ခ) ကိုထိန်လင်း နဲ့ လန်ဒန်မြို့ရှိ မြန်မာသံရုံးမှ တစ်ဆင့် တယ်လီဖုန်းဖြင့် အပြန်အလှန် ကောင်စစ်ဆိုင်ရာ ဆက်သွယ်ပြောဆိုမှု ပြုလုပ်ခဲ့တယ်လို့ အာဏာသိမ်း စစ်အုပ်စုက ဒီကနေ့ ညနေပိုင်းမှာ ထုတ်ပြန်ထားပါတယ်။
Photo – DKKS