တောင်ကြီး-အေးသာယာ အဆင်းလမ်းပဆောက်ကွေ့တွင် ယနေ့ နေ့လည်၂ နာရီ ခွဲဝန်းကျင်က တောင်ကြီး – ရန်ကုန် ရွှေတောင်ရိုး ခရီးသည်တင် ကားတစ်စီး ချောက်ထဲကျခါနီးဖြစ်ပွားခဲ့ကြောင်းသိရသည် ။
” ရွှေတောင်ရိုးကရှေ့ကကားကိုရှောင်ရင်း လမ်း ချော်ပြီးချောက် ထဲကျခါနီးဖြစ်သွားတာ ဓါတ်တိုင်ခံနေလို့ ကားမကျတာခရီး သည် တွေပါတယ် ၊ အဆင်းလမ်းက ဖြစ်နေကျပဲ မိုးကရွာတော့ လမ်းကချော်တယ် အကွေ့များတယ် သတိထားမောင်း ဖို့လိုမယ်” ဟု မျက်မြင်တွေ့သူတစ်ဦးကပြောသည် ။
အဆိုပါ ဖြစ်စဥ်တွင် လူထိခိုက်မှု မရှိ ကြောင်းသိရပြီး ကူညီကယ်ဆယ်ရေးအသင်း များက သွားရောက်ကူညီခဲ့ကြောင်းသိရသည် ။
ယခုလ (၃) ရက်နေ့ကလည်း ယာဉ်တစ်စီးလမ်းဘေးချောက်ထဲထိုးကျမှု ဖြစ်ပွားခဲ့ပြီး အဆိုပါဖြစ်စဉ်တွင် အဖြူရောင်ဗန်ကားတစ်စီး လမ်းဘေးမြေသားလမ်းအတိုင်း ချောက်ထဲသို့ ကျဆင်းသွားခဲ့ကြောင်းသိရသည် ။
တောင်ကြီး-အေးသာယာ အဆင်းလမ်းသည် အကွေ့အကောက်နှင့် အတက်အဆင်းများပြားသဖြင့် ယာဉ်မတော်တဆမှုများ မကြာခဏဖြစ်ပွားလေ့ရှိပြီး၊ ကားများလမ်းချော်၍ ချောက်ထဲပြုတ်ကျသည့် ဖြစ်စဉ်အပြင်၊ တွဲကားများ ဘရိတ်ပေါက်၍ တိုက်မိသည့် ဖြစ်စဉ်များလည်း ရှိခဲ့ဖူးကြောင်းသိရသည် ။
