သျှမ်းပြည်အရှေ့ပိုင်း၊ ကျိုင်းတုံမြို့မှာ ယခုနှစ်များထဲ ခိုး ဆိုး လုနှိုက်မှုများ ပေါများလာပြီး ဒေသအာဏာပိုင်တွေက ခရီးသွားလုပ်ငန်းတိုးချဲ့လာမယ့်အပေါ် ဒေသခံများစိုးရိမ်မှုတွေ ရှိနေတယ်လို့ သိရပါတယ်။
ကျိုင်းတုံမြို့ထဲကို ထိုင်းနိုင်ငံ၊ ချင်းရိုင်ခရိုင်နဲ့ မယ်ဆိုင်မြို့နယ်မှာ နေထိုင်သူတွေအနေနဲ့ “နယ်စပ်ဖြတ်သန်းခွင့် (Border Pass – အစိမ်းရောင်စာအုပ်)” ကို အသုံးပြုပြီး ၁၄ ရက်တာ တည်းခိုနေထိုင်ခွင့်ကို ဒေသအာဏာပိုင် တွေက စီစဥ်နေတယ်လို့ သိရပါတယ်။
“ ကျိုင်းတုံမြို့မှာ ခရီးသွားလုပ်ငန်း ပြန်လည်အသက်ဝင်လာရင် ဒေသစီးပွားရေးအတွက် အကျိုးရှိလာဖို့ မျှော်လင့် ပေမဲ့ အဓိကအရေးကြီးဆုံးကတော့ လုံခြုံရေးပါပဲ၊လက်ရှိ ကျိုင်းတုံမြို့မှာ ခိုးမှု၊ လုယက်မှုနဲ့ အခြား ရာဇ ဝတ်မှုတွေ ဖြစ်ပွားနေတဲ့အခြေအနေတွေကို စနစ်တကျ ထိန်းသိမ်းနိုင်ဖို့ လိုအပ်ပါတယ်၊ အထူးသဖြင့် လူကုန်ကူးမှု၊ ကျားဖြန့်လုပ်ငန်းတွေနဲ့ ဆက်နွယ်နေတဲ့ မသမာမှုတွေကို ထိထိရောက်ရောက် ရှင်းလင်းနိုင်မှသာ ပြည်တွင်း၊ ပြည်ပခရီးသွားတွေ ယုံကြည်စိတ်ချစွာ လာရောက်လည်ပတ်နိုင်မှာ” လို့ ကျိုင်းတုံမြို့ခံတစ်ဦးက ပြောပါတယ်။
ဗဟိုအစိုးရရဲ့ မူဝါဒအရလို့ဆိုပြီး တာချီလိတ်မြို့နယ်၊ လူဝင်မှုကြီးကြပ်ရေးဌာန၊ အုပ်ချုပ်ရေးပိုင်းနဲ့ လုံခြုံရေးဆိုင်ရာဌာနတွေက ကျိုင်းတုံမြို့အထိ ခရီးသွားလုပ်ငန်းတိုးချဲ့ဖွင့်လှစ်နိုင်ဖို့အတွက် ဆွေးနွေးညှိနှိုင်းမှုတွေကို မကြာသေးခင်က ပြုလုပ်ခဲ့တယ်လို့ သိရပါတယ်။
ဒါ့အပြင် ရှေ့လာမယ့်ကာလမှာလဲ တာချီလိတ်မြို့ကို “ရှမ်းပြည်သို့ ဝင်ပေါက်မြို့” အဖြစ် လုံခြုံစိတ်ချရသော ခရီးသွားဒေသတစ်ခုအဖြစ် ဖွံ့ဖြိုးတိုးတက်လာစေဖို့ မျှော်မှန်းထားပြီး ဂျပန်၊ ကိုရီးယားနဲ့ ဥရောပနိုင်ငံတွေက ခရီးသွားတွေပါ ယုံကြည်စိတ်ချစွာ လာရောက်လည်ပတ်နိုင်ရမယ်လို့လည်း အာဏာပိုင်အဖွဲ့က ဆိုပါတယ်။
မယ်ဆိုင်မြို့နယ်က အိမ်ထောင်စုစာရင်းရှိသူတွေကို ထုတ်ပေးထားတဲ့ နယ်စပ်ဖြတ်သန်းခွင့်စာအုပ် (Border Pass)စာအုပ်နဲ့ တာချီလိတ် ကနေ ကျိုင်းတုံ အထိ သွား ရောက်နိုင်ပြီး ၁၃ ည ၁၄ ရက်နေ့အထိ တည်းခိုနေထိုင်ခွင့် ရရှိနိုင်မှာဖြစ်တယ်လို့ သိရပါတယ်။
ယခုနှစ်ထဲ ကျိုင်းတုံမြို့မှာ ဓားပြမှုနဲ့ ရွှေဆိုင်ပိုင်ရှင်၊ ကုန်စုံဆိုင်ပိုင်ရှင်တွေကို ပြန်ပေးဆွဲမှုတွေဟာ ၅ ကြိမ်နဲ့အထက် ဖြစ်ပွားခဲ့ပြီး ဆိုင်ကယ်ခိုးယူမှုနဲ့ လုယက်မှုတွေ မကြာခဏဖြစ် ပွားနေတယ်လို့ ဒေသခံတွေရဲ့ အချက် အလက်တွေအရ သိရပါတယ်။