မြန်မာနိုင်ငံက လူငယ်တွေ တိုင်းတစ်ပါးနိုင်ငံသို့ သွားရောက်အလုပ်လုပ်ကိုင်နေကြတာဟာ နိုင်ငံတော် အတွက် အလွန်နစ်နာပြီး နိုင်ငံ့အရင်းအမြစ်တွေ များစွာဆုံးရှုံးရတယ်လို့ အာဏာသိမ်းစစ်ခေါင်းဆောင် မင်းအောင်လှိုင် က ပြောပါတယ်။
ဩဂုတ်လ ၃၁ ရက်နေ့က နေပြည်တော်ရှိ Naypyitaw State Academy မှာ ကျင်းပပြုလုပ်တဲ့ ထူးချွန်ကျောင်းသား/သူ ဆုပေးပွဲ အခမ်းအနားမှာ သူက အခုလိုထည့်သွင်းပြောသွားတာပါ။
ဒါ့အပြင် လူငယ်တွေအနေနဲ့ မိမိတို့နိုင်ငံက သင်ကြားပေးလိုက်တဲ့ ပညာရပ်တွေကို အသုံးချပြီး နိုင်ငံနဲ့ လူမျိုးအတွက် ပြန်လည်ကျေးဇူးဆပ်နိုင်ကြဖို့ တိုက်တွန်းထားသလို ဖွဲ့စည်းပုံအခြေခံဥပဒေ၊ တည်ဆဲ ဥပဒေတွေနဲ့ စည်းမျဥ်းစည်းကမ်းတွေ သိရှိလိုက်နာပြီး မှန်ကန်တဲ့ လုပ်ရပ်တွေနဲ့ နိုင်ငံကို အကျိုးပြု နိုင်အောင် ကြိုးစားကြဖို့ ပြောကြားခဲ့ပါတယ်။
မြန်မာလူငယ်တွေ အခုလို ပြည်ပကို အစုလိုက်အပြုံလိုက် ထွက်ခွာနေကြတာဟာ ၂၀၂၁ ခုနှစ် စစ်အာဏာသိမ်းပြီး နောက်ပိုင်းဖြစ်ပေါ်လာတဲ့ နိုင်ငံရေး၊ စီးပွားရေး အကျပ်အတည်းတွေကြောင့် ဖြစ်တယ်လို့ ကုလသမဂ္ဂ နဲ့ ပြည်တွင်းပြည်ပ သုတေသနအဖွဲ့တွေရဲ့ ထုတ်ပြန်ချက်တွေမှာ ဖော်ပြထားပါတယ်။
ဒါ့အပြင် ၂၀၂၄ ခုနှစ် ဖေဖော်ဝါရီလအတွင်းက ပြည်သူ့စစ်မှုထမ်းဥပဒေကို စတင် အသက်သွင်းလိုက်ပြီး နောက်ပိုင်း စစ်မှုထမ်း အကျုံးဝင်တဲ့ လူငယ်လူရွယ်တွေဟာ ပြည်ပသို့ ပိုမိုထွက်ခွာသွားခဲ့ကြတာပါ။
