သျှမ်းပြည်နယ်တောင်ပိုင်း ဒေသအချို့မှာ မိုးအဆက်မပြတ် ရွာသွန်းမှုကြောင့် ဒေသခံတွေရဲ့ စိုက်ခင်းတွေ ရေကြီးနှစ်မြှုပ်ပြီး ပျက်စီးသွားခဲ့တယ်လို့ သိရပါတယ်။
ယမန်နေ့ ဇွန်လ ၆ ရက်က မိုးသည်းထန်စွာ ရွာသွန်းမှုကြောင့် ပင်လောင်းမြို့နယ်၊ လုံးပိုး ကျေးရွာအုပ်စုအတွင်းရှိ နောင်ကားခေါင်းကျေးရွာအတွင်း ရေကြီးရေလျှံမှု ဖြစ်ပေါ်ခဲ့ကာ ဒေသခံတောင်သူများရဲ့ စိုက်ခင်းများအားလုံး ရေဖုံးလွမ်းသွားပြီး ထိခိုက်ပျက်စီး ဆုံးရှုံးခဲ့ရတယ်လို့ ဒေသတွင်းသတင်းရင်းမြစ်ထံမှ သိရပါတယ်။
“ပျက်စီးသွားတဲ့ စိုက်ခင်းတွေထဲမှာဆိုရင် ဒေသတွင်း အဓိက အားထား စိုက်ပျိုးတဲ့ ပြောင်း၊ ပဲနဲ့ ခရမ်းချဉ်သီး စတဲ့ စိုက်ခင်းတွေဖြစ်တဲ့အတွက် တောင်သူတွေအနေနဲ့ ဆုံးရှုံးမှု အမြောက်အမြား ကြုံတွေ့နေရတယ်” လို့ ဆိုပါတယ်။
အလားတူ တောင်းကြီးမြို့နယ်၊ ရွှေညောင်မြို့ရှိ တောင်လေးလုံးကျေးရွာမှာလည်း မိုးတောက်လျှောက် ရွာတဲ့အတွက် ယမန်နေ့ ညနေပိုင်းက တာယောချောင်းရေ လျှံတက်လာကာ ရေကြီးရေးလျှံမှု ဖြစ်ပေါ်ခဲ့တယ်လို့ သိရပါတယ်။
“တောင်လေးလုံးမှာ ဒီလိုမျိုး ရေကြီးရေလျှံဖြစ်တာ တခါမှ မကြုံဖူးဘူး၊ ဒီတခေါက် တော်တော် ဆိုးတယ်” လို့ ရွှေညောင်မြို့ခံတစ်ဦးက ၎င်းရဲ့ လူမှုကွန်ယက်စာမျက်နှာမှာ ပြောဆိုထားပါတယ်။
တာယောချောင်းရေ လျှံတက်မှုကြောင့် လူထိခိုက်သေဆုံးတာမရှိပေမယ့် ထိခိုက်ပျက်စီးမှုများ ရှိခဲ့ပြီး ရေစီးအားကြောင့် အုတ်တံတိုင်းပြိုကျမှုတွေဖြစ်တဲ့အထိ ရှိတယ်လို့ သိရပါတယ်။
လက်ရှိ မိုးတွင်းကာလဖြစ်တဲ့အတွက် သျှမ်းပြည်နယ်တောင်ပိုင်းအတွင်းရှိ ဒေသခံစိုက်ပျိုးတောင်သူ တွေအနေနဲ့ ရေကြီးရေလျှံမှု အန္တရာယ်နဲ့ စိုက်ခင်းများ ပျက်စီးနိုင်တဲ့ အခြေအနေတွေကို ကြိုတင်သတိပြု ပြင်ဆင်ကြဖို့ လိုအပ်လျက်ရှိတယ်လို့ သိရပါတယ်။
Photo – ဒေသခံ