ကရင်နီပြည်နယ်၊ ဖရူဆိုမြို့နယ်အတွင်းက ကျေးရွာ ၃ ရွာမှ နေအိမ် ၈၀ ကျော်ကို အာဏာသိမ်း စစ်အုပ်စုက အကြောင်းမဲ့ မီးရှို့ဖျက်ဆီးခဲ့တယ်လို့ ကရင်နီအမျိုးသားများကာကွယ်ရေးတပ် (KNDF)က ယမန်နေ့ ဇွန်လ ၃ ရက်က သတင်းထုတ်ပြန်ထားပါတယ်။
စစ်ကောင်စီရဲ့ စစ်ကြောင်းတွေက ၂၀၂၆ ခုနှစ် မတ်လမှ မေလအတွင်း ကျေးရွာ ၃ ရွာခန့်ရှိ အရပ်သားနေအိမ်တွေကို မီးရှို့ဖျက်ဆီးခဲ့တာလို့ ဆိုပါတယ်။
ထုတ်ပြန်ချက်အရ ဖရူဆိုမြို့နယ် ဘူးခူကျေးရွာဖက်သို့ စစ်ကြောင်းဝင်ရောက်စဥ် မတ်လ ၂၈ ရက်နေ့က ဒေသခံတွေရဲ့ နေအိမ် ၁၆ လုံး၊ မေလ ၆ ရက်နေ့က ထားလဲကျေးရွာမှ နေအိမ် ၆၀ ကျော်၊ မေလ ၇ ရက်နေ့က ပရယ်တော်ရွာမှ နေအိမ် ၄ လုံးတို့အား စစ်တပ်က အကြောင်းမဲ့ မီးရှို့ဖျက်ဆီးခဲ့ပြီး စစ်ရာဇဝတ် မှုများ ကျူးလွန်လုပ်ဆောင်ခဲ့တယ်လို့ KNDF က ဖော်ပြထားပါတယ်။
ဒါ့အပြင် မေလ ၃၁ ရက် ညပိုင်းနဲ့ ဇွန်လ ၁ ရက် နံနက်ပိုင်းတို့မှာ ဖရူဆိုမြို့နယ်အတွင်းရှိ အရပ်သား ပြည်သူများ နေထိုင်ရာ ကျေးရွာတစ်ရွာအတွင်းသို့ ဒရုန်းဖြင့် ဗုံးကြဲတိုက်ခိုက်မှုတွေ လုပ်ဆောင်ခဲ့ တာကြောင့် နေအိမ် ၃ လုံး ထပ်မံပျက်စီးခဲ့တယ်လို့ သိရပါတယ်။
လက်ရှိ စစ်ကောင်စီရဲ့ စစ်ကြောင်းတွေဟာ ဖရူဆို-ဘောလခဲ လမ်းမကြီးတစ်လျှောက် ခြေကုပ်စခန်းများ၊ စစ်ကြောင်းများနဲ့ စစ်ရေးလှုပ်ရှားနေပြီး တော်လှန်ရေးတပ်တွေနဲ့ ထိတွေ့မှုလည်း ရှိနေတယ်လို့ သိရပါတယ်။
စစ်ကောင်စီဘက်မှ အရပ်သားနေထိုင်ရာ ကျေးရွာတွေကို ဒရုန်းနဲ့ ဗုံးကြဲတာ၊ လက်နက်ကြီး ပစ်ခတ် တိုက်ခိုက်တာတွေ
လုပ်ဆောင်နေပြီး ပြည်သူတွေအနေနဲ့ ဘေးလွတ်ရာသို့ ထွက်ပြေး တိမ်းရှောင်နေကြရတာကြောင့် အရေးပေါ် စားနပ်ရိက္ခာနှင့် ဆေးဝါးအကူအညီများ လိုအပ်နေတယ်လို့ သိရှိရပါတယ်။