သျှမ်းပြည်နယ်အရှေ့ပိုင်း၊ ကျိုင်းတုံမြို့တွင် ခေမာရဋ်ရွှေဆိုင်ပိုင်ရှင် သေနတ်ဖြင့် ပစ်ခတ်ခံရပြီး သေဆုံးကာ ကားနှင့်ငွေသားများ အပါအဝင်ရွှေချိန်ပိဿာလိုက် လုယက်ခံရကြောင်း သိရသည်။
ကျိုင်းတုံမြို့၊ ရပ်ကွက်(၃)၊ ကျိုင်းငမ်းဝပ်အင်းလမ်းတွင် မေ ၁၃ ရက်၊ မွန်းလွဲပိုင်းက ခေမာရဋ်ရွှေဆိုင်ပိုင်ရှင် ဦးစိုင်းယီတစ် သည် ဈေးမှဆိုင်သိမ်းပြီး မော်တော်ယာဉ်ဖြင့် အိမ်သို့ ပြန်လာစဉ် ၄င်းအိမ်ရှေ့တွင် လုယက်ခံရခြင်းဖြစ်ကြောင်း စုံစမ်းသိရသည်။
” ဖြစ်တာက ရွှေဆိုင်ပိုင်ရှင် အိမ်ရှေ့တင်ပဲ သားဖြစ်သူနဲ့အလုပ်သမား အမျိုးသမီးတစ်ယောက်လဲပါတယ်၊ လုတဲ့သူတွေက တစ်ခြားကားနဲ့လာပြီး ပစ်သွားတယ် ကားထဲရှိတဲ့လူတွေကို ဆွဲချခဲ့ပြီး ကားပါယူသွားတာ” ဟု ကျိုင်းတုံ ဒေသခံတစ်ဦးကပြောသည်။
ဦးစိုင်းယီတစ်ထံမှ လုယက်ယူဆောင်ခံရသည့် ရွှေများမှာ သုံးပိဿာဟုလည်းကောင်း၊ ပိဿာ ၃၀ ခန့် ဟုလည်းကောင်း သတင်းအမျိုးမျိုးထွက်ပေါ်နေပြီး Hsan Loi Voice အနေဖြင့် သီးခြားအတည်ပြုနိုင်ခြင်းမရှိသေးပေ။
သေနတ်ဖြင့် ပစ်ခတ်ခံရမှုကြောင့် ရွှေဆိုင်ပိုင်ရှင် ဦးစိုင်းယီတစ် တွင် သေနတ်ဒဏ်ရာ ၂ ချက် ရရှိခဲ့ပြီး ဆေးရုံအရောက်တွင် သေဆုံးသွားကြောင်း သိရသည်။
အဆိုပါ လူသတ် ဓားပြတိုက်မှုဖြစ်စဥ်တွင် ကျူးလွန်သူများ လက်ရှိလွတ်မြောက်နေပြီး ကျိုင်းတုံမြို့တွင် ခိုးဆိုးလုယက်မှုများ မကြာခန ဖြစ်ပွားလေ့ရှိသဖြင့် ဒေသခံများ စိုးရိမ်ထိတ်လန့် နေရကြောင်းသိရသည်။