ယမန်နေ့ မေလ ၉ ရက် ညပိုင်းက ရန်ကုန်မြို့လည်ခေါင်ကြီးမှာ Yangon Heritage Night Run 2026 အပြေးပြိုင်ပွဲပြုလုပ်ခဲ့ကာ ပွဲစီစဥ်သူရဲ့ စီမံခန့်ခွဲမှု အားနည်းချက်ကြောင့် မြို့နေပြည်သူများ ပြစ်တင်ဝေဖန်ပြီး ညနေပိုင်း ရုံးဆင်းချိန်ဖြစ်တဲ့အတွက် ၃ နာရီနီးပါး ယာဥ်ကြောပိတ်ဆို့မှုတွေ ဖြစ်ခဲ့တယ်လို့ ရန်ကုန်နေပြည်သူတစ်ဦး ထံမှ သိရပါတယ်။
“အပြေးပြိုင်ပွဲလုပ်တာက ဘာမှမပြောလိုဘူး၊ ဒါပေမယ့် အများသူငှာ ရုံးဆင်းချိန်၊ အလုပ်သမားတွေ အလုပ်ပြန်တဲ့ချိန်ကြီးမှာ လုပ်တော့ ယာဥ်ကြောပိတ်ဆို့မှုတွေဖြစ်ပြီး အားလုံးက ဒုက္ခရောက်ကုန် ကြတာ၊ ညအပြေးပြိုင်ပွဲဆိုလို့ ညဘက်လူရှင်းတဲ့ ၉ နာရီ ၁၀ နာရီမှာ လုပ်မယ်လို့ထင်နေတာ ညနေ ၆ နာရီခွဲချိန်မှာ လုပ်ကြတာ” လို့ မြို့ခံတစ်ဦးက ပြောပါတယ်။
အဲ့ဒီ အပျော်တန်းအပြေးပြိုင်ပွဲကို အာဏာသိမ်းစစ်တပ်နဲ့ နီးစပ်တဲ့ ATOM ဆက်သွယ်ရေး အော်ပရေတာ က ဦးစီးကျင်းပတာဖြစ်ပြီး အာဏာသိမ်းစစ်ခေါင်းဆောင်အလိုကျ ရန်ကုန်မြို့မှာ Normalize ဖြစ်နေတယ်ဆိုပြီး ပုံဖော်နေတာလို့ မြို့ခံအချို့က ပြောပါတယ်။
ပြိုင်ပွဲမှာ ၁၅ ကီလိုမီတာနဲ့ ၅ ကီလိုမီတာ ဆိုပြီး ပြိုင်ပွဲ ၂ မျိုးပြုလုပ်ကာ ဆူးလေဘုရားလမ်းမှ စတင်ပြီး ဗိုလ်ချုပ်အောင်ဆန်းလမ်း၊ ပြည်လမ်း၊ အလုံလမ်း၊ ဦးထောင်ဘိုလမ်း၊ ဗဟန်းလမ်း၊ နတ်မောက်လမ်း၊ ကန်ရိပ်သာလမ်း၊ အထက်ပန်းဆိုးတန်းလမ်း၊ မဟာဗန္ဓုလလမ်း၊ ဗိုလ်တထောင်ဘုရားလမ်း၊ ကမ်းနား လမ်း အထိသတ်မှတ်ထားပါတယ်။
Public announcement တစ်စုံတစ်ရာ မရှိဘဲ အများပြည်သူတွေ အဓိကသွားလာတဲ့ မိန်းလမ်းတွေ အကုန်ပိတ်ခဲ့တာကြောင့် ယာဥ်ကြောပိတ်ဆို့မှု ဆိုးဆိုးရွားရွားဖြစ်ခဲ့ပြီး ရုံးဝန်ထမ်းတွေ၊ အလုပ်သမားတွေ အိမ်ပြန်ချိန်နောက်ကျခဲ့ရတယ်လို့ သိရပါတယ်။
Photo – credit to owner