သျှမ်းပြည်တောင်ပိုင်းက လဲချားမြို့နယ်နဲ့ ကျိုင်းတောင်းမြို့အနီးက အွန်လိုင်းလိမ်လည်လုပ်ငန်း (ကျားဖြန့်) လုပ်ကိုင်သူ တရုတ်နိုင်ငံသားနဲ့ မြန်မာနိုင်ငံသားအပါအဝင် ၃၆ ဦး ကို မေလ ၈ ရက်နေ့က ဖမ်းဆီးရမိခဲ့တယ်လို့ စစ်ကောင်စီက ထုတ်ပြန်ပါတယ်။
မေလ ၈ ရက်နေ့ နံနက်ပိုင်းက လဲချားမြို့နယ်၊ ဆီးဆောကျေးရွာရဲ့ အရှေ့ တောင်ဘက်အနီးမှာ ကျားဖြန့်လုပ်ကိုင်သူ တရုတ်နိုင်ငံသား အမျိုးသား ၂၅ ဦးနဲ့ မြန်မာနိုင်ငံသား အမျိုးသမီး ၅ ဦး စုစုပေါင်း ၃၀ ဦး ဖမ်းဆီးရမိခဲ့တယ်လို့ဆိုပါတယ်။
ဒါ့အပြင် လူနေတဲ့ ၂ လုံး၊ လုပ်ငန်းသုံးတဲ ၁ လုံး၊ မီးဖိုဆောင် ၁ လုံး၊ All In One ၂ လုံးနဲ့ ဆက်စပ်ပစ္စည်း အပါအဝင် ဖျက်ဆီးထားတဲ့ ဖုန်းမျိုးစုံ အလုံး ၉၀ ပါ ဖမ်းဆီးရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ယင်းနေ့ မွန်းလွဲပိုင်းမှာပဲ သျှမ်းတောင်၊ မိုင်းပန်မြို့နယ်၊ ကျိုင်းတောင်မြို့ တောင်ဘက် မီတာ ၁၂၀၀၀ ခန့်အကွာ မိုင်းပန်−ကျိုင်းတောင်း ကားလမ်းအနီးမှာ ကျားဖြန့်လုပ်ကိုင်သူ တရုတ်နိုင်ငံသား နောက်ထပ် ၆ ဦး ဖမ်းဆီးရမိခဲ့တယ်လို့ ဆိုပါတယ်။
ဖမ်းဆီးရမိသူတွေကို လိုအပ်တဲ့စစ်ဆေးမှု လုပ်ဆောင်ပြီးပါက ဥပဒေအရ အရေးယူသွားမယ်လို့ သိရပါတယ်။
အခုနှစ် မေလအတွင်းမှာဘဲ သျှမ်းပြည်တောင်ပိုင်းက ကျားဖြန့်လုပ်ငန်းလုပ်ကိုင်သူ ၁၀၀ ကျော်ကို စစ်အုပ်စုက ဖမ်းဆီးရမိခဲ့ပြီး ကျားဖြန့်လုပ်ငန်းမှာ နောက်ထပ်ပါဝင်ပတ်သက်သူတွေကိုလည်း ဆက်လက်ရှာဖွေ ဖမ်းဆီးဖို့ လုပ်ဆောင်နေတယ်လို့ သိရပါတယ်။
Photo – MOI