“ဝ”တပ် UWSA ထိန်းချုပ်တဲ့ နယ်မြေအတွင်းက မြန်မာ−တရုတ် နယ်စပ်ခြံစည်းရိုး ကျောက်တိုင်အနီးမှာ သံသယဖြစ်ဖွယ် လှုပ်ရှားမှုတွေ့ရှိပါက နီးစပ်ရာ “ဝ”ရဲတပ်ဖွဲ့ထံ ချက်ချင်း သတင်းပို့ တိုင်ကြားကြရန် “ဝ”ပြည် တရားရေးကော်မရှင်က တိုက်တွန်းထားတယ်လို့ “ဝ”ဒေသတွင်း သတင်းရင်းမြစ်တွေထံမှ သိရပါတယ်။
လက်ရှိ “ဝ”ဒေသအတွင်းက နယ်စပ်တလျှောက်ဒေသတွေမှာ စောင့်ကြည့်မှုတွေ အထူးတင်းကြပ် ထားပြီး လှည့်ကင်းလှည့်တာတွေ လုပ်ဆောင်နေသလို ညဘက်တွေမှာလည်း အရေးကြီးလမ်းပိုင်း တွေကို စောင့်ကြည့်တဲ့စနစ်နဲ့ ၂၄ နာရီဆောင်ရွက်နေတယ်လို့ သိရပါတယ်။
ပြီးခဲ့တဲ့ ဧပြီလကုန်ပိုင်းက “ဝ”တပ် ထိန်းချုပ်တဲ့ နမ့်တစ်(မန်ခါး)ဂိတ်နဲ့ ကိုးကန့်တပ် ထိန်းချုပ်တဲ့ ချင်းရွှေဟော်၊ ကြူကုတ်(ပန်ဆိုင်း)၊ ရွှေလီတို့ဘက်တွေမှာရှိတဲ့ နယ်စပ်စည်းမျဥ်းတွေကိုကျော်ပြီး တရုတ်ဘက်က ခြံစည်းရိုးအသစ်နဲ့ မြန်မာဘက်ခြမ်းသို့ တိုးချဲ့ကျုးကျော်ခြံခတ်လာပြီးတဲ့နောက် “ဝ”တပ် က ယခုလို နယ်စပ်လုံခြုံရေးတိုးမြင့် ဆောင်ရွက်လာတာပဲဖြစ်ပါတယ်။
တရုတ်ဘက်က နယ်မြေကျူးကျော်ကာ ခြံစည်းရိုးခတ်လာတာနဲ့ ပတ်သက်ပြီး အာဏာသိမ်း အစိုးရဘက်က ယနေ့ချိန်ထိ နှုတ်ဆိတ်နေပြီး တစ်စုံတစ်ရာထုတ်ပြန်ထားတာမရှိသေးပါဘူး။
Photo – WSP