ထိုင်းနိုင်ငံမြောက်ပိုင်း၊ ချင်းမိုင်မြို့ရှိ အလုပ်သမားစခန်းတစ်ခုမှာ အလုပ်ရှင်ကို သတ်ဖြတ်ပြီး ထွက်ပြေးသွားခဲ့တဲ့ သံသယရှိသူ မြန်မာအလုပ်သမား ၄ ဦးကို မြန်မာ−ထိုင်းနယ်စပ် ချင်းရိုင်းမှာ ဖမ်းဆီးရမိခဲ့တယ်လို့ ထိုင်းသတင်းတွေမှာ ဖော်ပြထားပါတယ်။
ဖြစ်စဥ်မှာ မေလ ၁ ရက်နေ့ နံနက် ၂ နာရီခန့်အချိန်မှာ သံသယရှိသူ ၄ ဦးက ၎င်းတို့နဲ့ အတူ အလုပ်သမားစခန်းမှာ နေထိုင်တဲ့ အသက် ၄၉ နှစ်အရွယ် သျှမ်းတိုင်းရင်းသား(ထိုင်းယိုင်) အလုပ်ရှင်ဖြစ်သူ နိုင်းဆုမ်ချိုင်း ကို သတ်ဖြတ်ရန် ကြံစည်ခဲ့တာဖြစ်ပါတယ်။
အဓိက အကြောင်းရင်းမှာ အလုပ်ရှင်ဖြစ်သူက အလုပ်သမားများကို လုပ်ခလစာ ပေးချေခြင်းမရှိဘဲ ဖြတ်တောက်ထားခြင်းကြောင့် ဖြစ်တယ်လို့ သိရပါတယ်။
ရဲတပ်ဖွဲ့ရဲ့ ပြောကြားချက်အရ သေဆုံးသူ အလုပ်ရှင် အိပ်ပျော်နေစဥ်မှာ ဆု(Su) နဲ့ ယောင်း(Yao)က အိပ်ပျော်နေတဲ့ ဆုမ်ချိုင်းရဲ့ လည်ပင်းကို ဓါးနဲ့ လှီးဖြတ်ပြီး ဒမ်(Dam) နဲ့ ဘော့စ်(Boss) က ကင်းစောင့်ပေးခဲ့တယ်လို့ ဆိုပါတယ်။
၎င်းတို့ ကျုးလွန်ပြီးတဲ့နောက် အလုပ်သမားစခန်းမှ ခြေကျင်ထွက်ပြေးခဲ့တာကို CCTV မှတ်တမ်းများအရ တွေ့ရှိခဲ့ရပြီး ချင်းရိုင်းခရိုင်မှတဆင့် မြန်မာနိုင်ငံသို့ ပြန်လည်ဝင်ရောက်ရန် ကြိုးပမ်းနေစဥ် ဝပ်ရွန်ခွန် (Wat Rong Khun) အနီးမှာ ဖမ်းဆီးခံခဲ့ရတယ်လို့ သိရပါတယ်။
သံသယရှိသူ ၄ ဦးစလုံးကို လူသတ်မှုနဲ့ တရားစွဲဆိုထားပြီး ထိုင်းရဲတပ်ဖွဲ့ စစ်ဆေးမေးမြန်းချိန်မှာ ၎င်းတို့ရဲ့ ပြစ်မှုကို ဝန်ခံထွက်ဆိုခဲ့ပြီး လုပ်ခလစာများကို အမြဲတမ်းတောင်းဆိုနေရပြီး အချို့မှာ မရရှိတာကြောင့် စိတ်နာကာ သတ်ဖြတ်ခဲ့တာဖြစ်တယ်လို့ ထွက်ဆိုခဲ့ကြပါတယ်။
လက်ရှိမှာတော့ လူသတ်မှုကျုးလွန်သူတွေကို ဥပဒေအရ ဆက်လက်အရေးယူနိုင်ဖို့ မဲရင် (Mae Rim) ရဲစခန်းသို့ လွှဲပြောင်းပေးလိုက်ပြီဖြစ်တယ်လို့ သိရှိရပါတယ်။
Photo – Chiang Mai News