အီရန်နဲ့ငြိမ်းချမ်းရေးဆွေးနွေးဖို့ ပါကစ္စတန်သို့ စေလွတ်မယ့် အမေရိကန် အဆင့်မြင့် ကိုယ်စားလှယ်တွေရဲ့ ခရီးစဥ်ကို ထရမ့် ဖျက်သိမ်းလိုက်တာကြောင့် ရေနံဈေးနှုန်းများ ပြည်လည်မြင့်တက်လာ

သမ္မတထရမ့်ရဲ့ ဆုံးဖြတ်ချက်အပြောင်းအလဲကြောင့် နှစ်နိုင်ငံအကြား ငြိမ်းချမ်းရေးအတွက် လမ်းစပျောက်နေပြီး အပစ်အခတ်ရပ်စဲရေး သဘောတူညီချက်အောက်မှာသာ ရှိနေပြီး ရှေ့မတိုးနိုင်တဲ့ အခြေအနေမှာ ရှိနေတာပါ။

တစ်ချိန်တည်းမှာပင် အမေရိကန်နဲ့ အီရန်တို့ဟာ ပါရှန်းပင်လယ်ကွေ့နဲ့ ကမ္ဘာ့ရေနံတင်ပို့မှုမှာ အရေးပါတဲ့ ဟော်မုဇ်ရေလက်ကြား(Strait of Hormuz) ရှိ သင်္ဘောလိုင်းများကို အပြန်အလှန် ပိတ်ဆို့ ရန် ကြိုးပမ်းခြင်းဖြင့် တစ်ဖက်နဲ့တစ်ဖက် စီးပွားရေးအရ ထိုးနှက်နေကြတာ ဖြစ်ပါတယ်။

ကမ္ဘာရေနံဈေးကွက်ရဲ့ စံနှုန်းဖြစ်တဲ့ ဘရန့်ဒ်(Brent) ရေနံစိမ်း ဈေးနှုန်းဟာ လာမည့်စာချုပ်များအတွက် ၁ ရာခိုင်နှုန်းကျော် မြင့်တက်လာခဲ့ပြီး ဇွန်လအတွက် ရေနံတန်ဖိုး ခန့်မှန်းချက်မှာ တစ်စည်လျှင် ၁၀၇ ဒေါ်လာဝန်းကျင်သို့ရောက် ရှိသွားပြီး ဇူလိုင်လအတွက်မှာမူ တစ်စည်လျှင် ၁၀၁ ဒေါ်လာအထိ မြင့်တက်ခဲ့ပါတယ်။

စစ်ပွဲကြောင့် ရေနံရရှိရန် ခက်ခဲနေသဖြင့် လူအများစုမှာ ရေနံကို အမြန်ရရှိနိုင်ဖို့ ပုံမှန်ထက် ဈေးပိုပေးတဲ့ ဆန္ဒရှိနေပြီး အမေရိကန်ရေနံစိမ်း(WTI) ဈေးနှုန်းမှာလည်း ဇွန်လစာချုပ်အတွက် ၂ ရာခိုင်နှုန်းခန့် မြင့်တက်ကာ တစ်စည်လျှင် ၉၆ ဒေါ်လာ ဝန်းကျင်သို့ ရောက်ရှိလာခဲ့ပါတယ်။

တနင်္လာနေ့ အမေရိကန်စတော့ဈေးကွက် ဖွင့်လှစ်ချိန်မှာ S&P 500 အညွှန်းကိန်းသည် ၀.၁ ရာခိုင်နှုန်းခန့် အနည်းငယ် မြင့်တက်လာနိုင်ကြောင်း ခန့်မှန်းထားပါတယ်။

ပြီးခဲ့သည့်အပတ်က ၎င်းအညွှန်းကိန်းဟာ ၀.၅ ရာနိုင်နှုန်းခန့် မြင့်တက်ခဲ့ပြီး ၂၀၂၄ ခုနှစ် အောက်တိုဘာလနောက်ပိုင်း ပထမဆုံးအကြိမ်အဖြစ် လေးပတ်ဆက်တိုက် မြင့်တက်ခဲ့တဲ့ မှတ်တမ်းဝင် ခဲ့ပါတယ်။

ရေနံနှင့် သဘာဝဓာတ်ငွေ့ အမြောက်အမြား တင်သွင်းနေရတဲ့ အာရှနိုင်ငံများရဲ့ စတော့ဈေးကွက် များမှာလည်း သိသိသာသာ မြင့်တက်ခဲ့ပါတယ်။

ရင်းနှီးမြှုပ်နှံသူများနဲ့ စီးပွားရေးအကဲခတ်သူများကတော့ ကမ္ဘာ့ရေနံနှင့် သဘာဝဓာတ်ငွေ့ ကူးသန်း ရောင်းဝယ်ရေး အချက်အချာကျတဲ့ ဟော်မုဇ်ရေလက်ကြားရဲ့ အခြေအနေကို စိုးရိမ်တကြီး စောင့်ကြည့်နေကြသလို နှစ်နိုင်ငံအကြား တင်းမာမှုများ ဆက်ရှိနေဦးမည်ဆိုပါက ကမ္ဘာ့စွမ်းအင် ကဏ္ဍနဲ့ ငွေကြေးဈေးကွက်အပေါ် ရိုက်ခတ်မှုများ ပိုမိုပြင်းထန်လာနိုင်တယ်လို့ စီးပွားရေးပညာရှင်တွေက သုံးသပ်နေကြပါတယ်။

ကိုးကား − The New York Time