သျှမ်းပြည်နယ်တောင်ပိုင်း၊ လင်းခေးခရိုင်၊ လင်းခေးမြို့ရှိ နမ့်တိန်းချောင်းအတွင်း ရေနှစ်သွားတဲ့ကလေး သေဆုံးလျက် အလောင်းပြန်တွေ့ခဲ့တယ်လို့ မြို့ခံတွေဆီက သိရပါတယ်။
ပြီးခဲ့တဲ့ ဧပြီလ ၁၇ ရက် နံနက် ၁၁ နာရီဝန်းကျင်အချိန်ခန့်က နမ့်တိန်းချောင်းအတွင်း ရေဆင်းချိုးရာမှ ရေနှစ်သွားတဲ့ ကလေးငယ်အား လင်းခေးမြို့ မီးသတ်တပ်ဖွဲ့မှ ရှာဖွေရေးလုပ်ငန်း လုပ်ဆောင်ပြီး ယမန်နေ့ ဧပြီလ ၁၉ ရက် မွန်းလွဲပိုင်းမှာ အလောင်းပြန်လည်တွေ့ရှိခဲ့တယ်လို့ သိရပါတယ်။
“သူ့အမေပြောတာတော့ မီတာခသွားဆောင်မယ်ဆိုပြီးသွားတာပေါ့၊ ပြီးမှ ရေချောင်းမှာ ရေသွားချိုးရင်း ရေနှစ်သွားတာလို့တော့ သိရတယ်၊ အသက်ငယ်ငယ်လေးပဲရှိသေးတယ်၊ မနေ့က မွန်းလွဲပိုင်းလောက်မှာ မီးသတ်အဖွဲ့တွေ ပန်ကျိုင်းနားမှာ အလောင်းပြန်တွေ့တာ” လို့ လင်းခေးမြို့ခံတစ်ဦးက Hsan Loi Voice ကိုပြောပါတယ်။
ရေနှစ်သေဆုံးသွားတဲ့ ကလေးဟာ လင်းခေးမြို့၊ ဝမ်လွိုင်ရပ်ကွက်နေ အသက် ၁၂ ခန့်အရွယ်ရှိ စိုင်းပိုင်ခမ်း ဖြစ်တယ်လို့ သိရပါတယ်။
ရေအတိမ်အနက် မသိတဲ့ နမ့်တိန်းချောင်းထဲ ရေဆင်းချိုး၊ ရေဆော့ကစားမယ်ဆိုပါက လူကြီး လူငယ်မရွေး အထူးဂရုပြုကြရန် မြို့ခံတွေက သတိပေးထားပါတယ်။
Photo – လင်းခေးမီးသတ်တပ်ဖွဲ့