သျှမ်းပြည်မြောက်ပိုင်း လားရှိုးမြို့၊ အမှတ် ၃ ရပ်ကွက်ရှိ ကားဂိတ်တစ်ခုအနီးတွင် ယနေ့ ဧပြီ ၂ ရက် နံနက်ပိုင်းက ပါဆယ်ထုတ်ပစ္စည်း လာပို့သည့် အသက်၂၅ နှစ်အရွယ် ယာဥ်မောင်းတစ်ဦး သေနတ်ဖြင့် ပစ်ခတ်ခံရကြောင်း ဒေသခံများထံမှ သိရသည်။
“ ကားသမားက ပါဆယ်ထုတ် တန်ဖိုးကြီးတယ်ပြောပြီး ပိုတောင်းတော့ ကားထဲလိုက်ယူဆိုပြီး ကားထဲက ပစ်လိုက်တာလို့ သိရတယ် ၊ အခုဆေးရုံးမှာ လည် ပင်းတော့ ထိထားတယ်ကြားတယ်၊ ကားသမားတွေက အကုန်ကြောက်နေရတယ် ရှာစားရတာမလွယ်ဘူး ” ဟု လားရှိုးယာဥ်လိုင်းပြေးဆွဲနေသူတစ်ဦးကပြောသည်။
သေနတ်ထိမှန်သူ ယာဥ်မောင်းမှာ ပန်ဆန်း – လားရှိုး ပြေးဆွဲနေသည့် ကားသမားတစ်ဦးဖြစ်ပြီး “ဝ” ဒေသ၊ ပန်ဆန်းမှ သယ်လာသော ပစ္စည်းသယ်ဆောင်ခ တောင်းစဉ် သေနတ်ဖြင့် ပစ်ခတ်ခံခဲ့ခြင်း ဖြစ်ကြောင်းသိရသည်။
လားရှိုးမြို့ကို စစ်ကောင်စီ ပြန်လည်ထိန်းချုပ်ပြီးနောက် ခိုး၊ ဆိုး၊ လု၊ နှိုက် အမှုများအပြင် လူသတ်မှု ပြန်ပေးဆွဲမှုများ မကြာခဏ ဖြစ်ပွားနေပြီး ပြီးခဲ့သည့်ဖေဖော်ဝါရီ ၂၄ ရက် ညနေပိုင်းတွင်လည်း လားရှိုးမြို့ ၊ ရပ်ကွက် – ၅ ရှိ ကုန်စုံဆိုင်ပိုင်ရှင် အမျိုးသမီးကို အရပ်ဝတ်ဖြင့် သေနတ်ကိုင် ၃ ဦးက သေနတ်ထောက်၍ ဖမ်းဆီးခေါ်ဆောင်သွားသည့် ဖြစ်စဥ်များ ဖြစ်ပွားခဲ့ကြောင်းသိရသည် ။
Photo-credit